Беларуская фітнэс-трэнерка два гады пакутавала ад невядомай хваробы. Здаецца, яна знайшла адказ — але ад яго не лягчэй

Хвароба пачалася, калі Валянціна жыла на Балі. Першыя сімптомы — слабасць, галаўны боль, дыскамфорт у паясніцы, закладзены нос і паценне па начах. За наступныя паўгода болі ў спіне і праблемы з носам пагоршыліся. 

Валянціна шукала ў Інданезіі дактароў, якія б ёй дапамаглі, але безвынікова. За наступны год яна прайшла багата абследаванняў у Беларусі і іншых краінах, піла шмат лекаў і нават хадзіла да экстрасэнсаў, але нічога не дапамагала. Да ранейшых сімптомаў дадаліся шмат іншых, у тым ліку моцныя болі ва ўсім целе.

Дзяўчына падазравала, што мае нейкую паразітарную інфекцыю ці праблемы з пазваночнікам. Але ў сярэдзіне 2025‑га даведалася, што справа, верагодна, не ў іх.

Павялічыць

Валянціна паляцела ў Індыю, каб трапіць да тамтэйшых інфекцыяністаў — маўляў, калі яны ўсё жыццё працуюць з трапічнымі інфекцыямі, то дапамогуць ёй з яе меркаванай паразітарнай інфекцыяй. Візіт не прынёс вынікаў. 

Але пасля яго беларуска пазнаёмілася з дзяўчынай у падобнай сітуацыі, якая мае аналагічныя сімптомы і якой на той час тры гады не маглі дапамагчы дактары. Яна прапанавала Валянціне паглядзець фільм «Пад маёй скурай» пра людзей, хворых на хранічную хваробу Лайма, і беларуска пазнала ў сімптомах сябе. 

Валянціна здала аналіз, і ў яе знайшлі антыцелы да ўзбуджальніка хваробы Лайма. Дзяўчына ўспомніла, што раней, да пераезду на Балі, любіла бавіць час на прыродзе. Магчыма, тады яе ўкусіў клешч, ад якога яна атрымала барэліі — так называюць бактэрыі, якія выклікаюць хваробу Лайма.

Павялічыць

Цяпер Валянціна лічыць, што ў яе хранічная хвароба Лайма і каінфекцыі, то-бок ад таго самага кляшча дзяўчына атрымала і іншыя мікробы. Пасля таго, як з’явіўся гэты дыягназ, беларуска шукае доктара. Яна запісала відэа з субцітрамі на англійскай мове, дзе папрасіла параіць ёй любога медыка ў любой краіне, гатовага папрацаваць з хранічнай хваробай Лайма.

У сучаснай медыцыне дыскутуюць наконт дыягназу «хранічная хвароба Лайма», бо няма істотных доказаў, што пасля вылечвання вострай формы хваробы ў арганізме застаюцца барэліі. Пры гэтым аналіз на антыцелы можа заставацца станоўчым і нейкі час пасля таго, як пацыент ачуняў, таму ён не даказвае наяўнасць актыўнай інфекцыі проста цяпер. Тое ж самае і з каінфекцыямі — калі аналізы на іх станоўчыя, гэта не заўжды азначае наяўнасць актыўнай інфекцыі.

Медыкі, аднак, прызнаюць, што пасля хваробы Лайма сімптомы могуць захоўвацца гадамі. Але большасць дактароў лічаць, што правільней выдзяляць такі стан у асобны дыягназ — постбарэліёзны сіндром, а не казаць пра хранічную хваробу Лайма.

У наступныя месяцы Валянціна спрабавала лячыцца, але яе стан толькі пагаршаўся. Дзяўчына звязала гэта з тым, што праз наступства адной з каінфекцый працягвала шпігаваць сябе рэчамі, якія нібыта мусілі палегчыць яе стан. Яна прызнаецца ў інстаграме, што прайшла праз розныя схемы антыбіётыкаў, плазмаферэз, прымала зёлкі і лячылася з дапамогай пчол.

Дзяўчына дагэтуль пакутуе ад сутаргаў і моцных боляў, ёй прапісваюць транквілізатары, каб хоць трохі палепшыць яе стан. Яна піша ў сторыс, што ў студзені 2026‑га трапіла ў РНПЦ неўралогіі і неўрахірургіі, дзе па яе справе зладзяць рэспубліканскі кансіліум.

Павялічыць

Але яна не чакае, што па выніках атрымае лячэнне менавіта ад хваробы Лайма:

«Неўролагі тут прыслухаліся да таго, каб паглядзець дакументальны фільм «Пад нашай скурай» […] Зразумела, што супраць сістэмы ніхто не пойдзе. Не ведаю, што будзе на кансіліуме праз пару дзён».

Сілы ў дзяўчыны ўжо заканчваюцца. У яе інстаграме апублікавалі галасавое паведамленне ад яе:

«Ведаеш, мне сёння так моцна дрэнна, што я ўжо, калі шчыра, развітваюся з жыццём. Не ведаю, ці ёсць у гэтым нейкі сэнс».

• 0
• 1
• 2
• 2
• 7
• 52
• 0
• 0