Пасля атакі ў Міжземным моры расійскія танкеры, якія перавозяць звадкаваны прыродны газ, пачалі змяняць свае маршруты. Адзін з іх — танкер «Буран» з грузам з праекта «Арктык СПГ-2» — адмовіўся заходзіць у Міжземнае мора і накіраваўся ў абыход Афрыкі, выбраўшы значна больш доўгі шлях. Іншы танкер, Arctic Pioneer, які вяртаўся з Кітая без грузу, спыніўся каля ўзбярэжжа Егіпта, піша Reuters.
3 сакавіка каля берагоў Лівіі ў Міжземным моры быў патоплены яшчэ адзін танкер, што працаваў для таго ж праекта, — Arctic Metagaz. Паводле паведамленняў, судна атакавалі марскія беспілотныя катары і дроны. Экіпаж удалося выратаваць.
Расійскія ўлады заявілі, што за нападам нібыта стаіць Украіна, і назвалі гэта міжнародным тэрарызмам і марскім пірацтвам. Украінскі бок адказнасць за інцыдэнт не прызнаў.
Страта нават аднаго такога судна лічыцца сур’ёзнай праблемай для праекта «Арктык СПГ-2», які ўжо знаходзіцца пад заходнімі санкцыямі. У адрозненне ад нафтавых танкераў, у свеце адносна мала спецыяльных газавозаў, таму хутка замяніць іх складана.
Патоплены танкер быў пабудаваны яшчэ ў 2003 годзе, але ўсё адно заставаўся важнай часткай флоту. Танкер «Буран» належыць да апошняй серыі арктычных газавозаў, якія кампанія атрымала ў Паўднёвай Карэі ў 2023 годзе.
Аналітыкі адзначаюць, што пагроза новых атак прымушае расійскі флот, які выкарыстоўваецца для перавозкі газу ў абыход санкцый, мяняць маршруты. Гэта яшчэ больш ускладняе экспарт з праекта «Арктык СПГ-2».
Фактычна адзіным пакупніком газу з гэтага праекта цяпер з’яўляецца Кітай, які атрымлівае яго па складанай лагістычнай схеме і, як мяркуецца, па даволі нізкай цане.
Цяпер чытаюць
Хто той хлопец, які чакаў дзяўчыну пад дажджом у Мінску? Вы дакладна бачылі тое рамантычнае відэа14
Каментары