Вядомы беларускі топ-менеджар пахваліўся, што вывучыў французскую да ўзроўню В1 за чатыры месяцы
Аляксандр Сліборскі — тэхнічны дырэктар і сузасавальнік Qulix, вядомай у свеце ІТ-кампаніі з беларускімі каранямі. Апошнія гады кампанія актыўна спрабуе пашырыць кола еўрапейскіх партнёраў. Сліборскі выклікаў фурор у беларускім сегменце Linkedin, калі прызнаўся, што хутка вывучыў французскую мову без рэпетытара.
Qulix — даўняя беларуская кампанія з офісамі ў розных краінах свету (на сёння цэнтральным указаны польскі, пры гэтым у беларускім офісе застаюцца працаваць сотні людзей, якія генеруюць 30 мільёнаў рублёў гадавога даходу).
Кампанія спецыялізуецца на рашэннях для банкінга і фінтэха. Сярод кліентаў — Vodafone, французскія банкі Societe Generale, BNP Paribas і інш.
Аляксандр Сліборскі — адзін з сузаснавальнікаў і найбольш публічных асобаў у кампаніі. Пазнавальны ў асяродках бізнэсоўцаў і праграмістаў.
Нядаўна ён пахваліўся ў Linkedin сваім лінгвістычным прарывам, суправадзіўшы доказам — сертыфікатам аб здачы французскай мовы на ўзровень В1.
Узровень B1 (Intermediate або «сярэдні») — гэта ступень валодання замежнай мовай паводле сістэмы CEFR, якая дазваляе ўпэўнена камунікаваць у большасці сітуацый падчас падарожжаў, разумець асноўныя думкі выразнай мовы, чытаць нескладаныя тэксты і апісваць уражанні, падзеі і планы.
«З поўнага нуля да афіцыйнага ўзроўню B1 па французскай за 4 месяцы самастойна і без чыт-кодаў. […] Для мяне гэта было адным з самых складаных навучанняў у жыцці і прынесла вялікае задавальненне ад выніку.
Не раз і не два ў галаве з’яўляліся думкі, што я ўжо занадта стары для ўсяго гэтага […], што ў мяне не атрымаецца вывучыць новую мову, тым больш — у такія тэрміны. Я не разумеў ні слова з таго, што чуў, я не мог запомніць усе гэтыя выключэнні і выключэнні з выключэнняў, мяне засмучала, што гэтая мова зусім не падобная да англійскай (больш за тое, мне пастаянна здавалася, што веданне англійскай вельмі моцна перашкаджае ў вывучэнні).
Хацелася расслабіцца і закінуць усё. Тым больш я ніколі не меў схільнасці да моў (адзіная чацвёрка ў школе ў мяне была менавіта па англійскай, і крыж на маіх здольнасцях нармальна размаўляць па-англійску настаўніца паставіла там жа)», — напісаў Сліборскі і дадаў сакрэт поспеху.
«Калі вы такія ж і калі ў вас таксама не атрымліваецца, але вельмі трэба, у мяне ёсць чароўная таблетка. Але прымаць яе трэба рэгулярна. Кожны дзень. Нават калі вам здаецца, што гэта бессэнсоўна. Я думаю, менавіта гэта мне і дапамагло. Кожны дзень я надаваў мінімум 15 хвілін (часцей 30—45), я склаў сваю праграму, і я вельмі хацеў — проста хацеў дайсці да выніку.
І цяпер на ўласным досведзе магу сказаць: матывацыя і дысцыпліна (асабліва калі матывацыі няма) робяць цуды», — параіў ён і дадаў, што спадзяецца, што следам за французскай мовай атрымаецца лепш рассмакаваць і французскі рынак.
У каментарыях Сліборскаму заўважылі, што здаць экзамен на В1 і ведаць мову на тым жа ўзроўні — гэта не тое ж самае. Беларускі бізнэсовец пагадзіўся з заўвагай.
Каментары