Палітык, які не браў удзелу ў выбарах, шматразова судзімы. Што вядома пра літоўца з прапагандысцкіх перадач БТ

Палітык, які ніколі не ўдзельнічаў у выбарах

Антанас Кандротас нарадзіўся ў Коўне 28 снежня 1980 года. Ён вядомы таксама пад мянушкай Цэлафан, у літоўскіх медыя фігуруе як Kandrotas-Celofanas.

У 2020 годзе ён збіраўся ісці на выбары ў парламент з партыяй «Саюз змагароў за Літву», але партыя не заплаціла ўнёсак, не сабрала подпісы, а таму яе не зарэгістравалі для ўдзелу ў выбарах.

Гэта невялікая ультраправая партыя, якую ўзначальваў скандальны мэр Коўна Вітаўтас Шустаўскас (памёр у 2023 годзе), што заяўляў пра намер прасіць палітычнага прытулку ў Беларусі — яго некалькі разоў затрымлівалі за знявагу паліцэйскіх. Меў прарасійскія погляды, выступаў супраць інтэграцыі Літвы ў Еўрасаюз і НАТА, адзін раз абіраўся ў парламент, а вядомасць яму прынёс так званы Баль жабракоў, які ён зладзіў у 1999 годзе для народа перад віленскай Ратушай, дзе тады першыя асобы дзяржавы праводзілі дабрачынны «Венскі баль».

У 2024 годзе Антанас Кандротас заяўляў пра намер удзельнічаць у прэзідэнцкіх выбарах ад узначаленай ім партыі «Мы — Літва» («Mes Lietuva»), але яго не зарэгістравалі, бо ён не падаў усіх патрэбных дакументаў.

Шмаразова асуджаны за фінансавае махлярства і не толькі

У 2013 годзе Віленскі акруговы суд упершыню асудзіў Кандротаса за фінансавае махлярства. Тады яго пакаралі пазбаўленнем волі на адзін год і 7 месяцаў. У 2007 годзе ён стварыў фіктыўную кампанію, якая набывала актывы ў доўг, а потым знік.

Другі раз на такі ж тэрмін яго асудзілі ў 2017 годзе — ён не сплаціў 700 тысяч еўра падаткаў за дзейнасць фіктыўнай кампаніі, якая займалася набыццём і продажам бензіну.

Павялічыць

У лістападзе 2023 года яго асудзілі на чатыры гады зняволення за фінансавае махлярства, але ў 2025 годзе датэрмінова вызвалілі.

У верасні 2025 года Антанаса Кандротаса асудзілі на 4 гады пазбаўлення волі за ўдзел у беспарадках каля літоўскага парламента. Прысуд пакуль не набыў юрыдычную сілу, бо Кандротас яго абскардзіў і працэс пакуль не завершаны.

Сёлета ў лютым суд разглядаў справу супраць яго за абразу былога дэпутата і распальванне нянавісці на глебе сэксуальнай арыентацыі. Абвінавачанне прасіла суд пакараць яго адным годам пазбаўлення волі.

Удзельнік антыглабалісцкіх пратэстаў

Кандротас быў удзельнікам акцый пратэсту супраць абмежаванняў праз пандэмію COVID-19. На іх ён справакаваў сутыкненні з паліцыяй, суд абмежаваў яго ў магчымасці ўдзельнічаць у далейшых пратэстах. На судовых пасяджэннях ён у знак пратэсту супраць нашэння масак заклейваў рот скотчам.

«Палітычны эксперт» прапаганды ў Беларусі быў адным з арганізатараў «Вялікага маршу ў абарону сям’і» ў маі 2021 года супраць прапанаванага ўрадам праекта закона аб грамадзянскім партнёрстве.

Удзельнічаў у антыўкраінскіх акцыях пасля расійскага ўварвання ва Украіну.

Сувязі з Беларуссю

У 2021 годзе яго заўважылі за рулём аўтамабіля з чырвонымі нумарнымі знакамі — такія знакі маюць машыны дыпламатычных прадстаўніцтваў у Літве. Згодна з інфармацыяй літоўскіх медыя, аўтамабіль мог належаць пасольству Беларусі ў Літве. Але Антанас Кандротас гэта абвяргаў і сцвярджаў, што машына належыць Мальтыйскаму ордэну, сябрам якога ён нібыта з’яўляўся. Мальтыйскі ордэн гэта адхіліў і афіцыйна ад Кандротаса дыстанцыяваўся.

На сваёй старонцы ў Facebook Celofanas LIVE Антанас Кандротас публікаваў допісы супраць Святланы Ціханоўскай.

У студзені 2022 года Антанас Кандротас наведваў Беларусь разам з іншымі ўдзельнікамі антыеўрапейскай партыі «Зара справядлівасці» (яе ўзначальваў Альгірдас Палецкіс, асуджаны за шпіянаж на карысць Расіі) і ўдзельнічаў у сустрэчы з міністрам замежных спраў Уладзімірам Макеем. Яны называлі сябе прадстаўнікамі «літоўскай грамадзянскай супольнасці» і на сустрэчах абураліся палітыкай урада Літвы ў дачыненні да Беларусі пасля прымусовай пасадкі самалёта Ryanair з Раманам Пратасевічам на борце, прэзідэнцкіх выбараў 2020 года і мігранцкага крызісу, які ўлады Беларусі распачалі ў 2021 годзе супраць сваіх еўрапейскіх суседзяў.

У жніўні 2025 года Кандротас актыўна ўдзельнічаў у мітынгу супраць прысутнасці Святланы Ціханоўскай у Літве, які арганізаваў крайне правы дэпутат Вітаўтас Сініца.

• 2
• 0
• 0
• 2
• 0
• 0
• 0
• 0