Былы кіраўнік «Фольксвагена» заклікаў і радыкальна рэфармаваць Германію, і замяніць ЕС на саюз іншага тыпу
Былы генеральны дырэктар Volkswagen Маціяс Мюлер заявіў, што Германія знаходзіцца ў глыбокім крызісе і рухаецца да мадэлі, якую ён назваў «ГДР 2.0», піша BILD.
У інтэрв’ю выданню t-online Мюлер раскрытыкаваў цяперашнюю палітыку ўлад і заявіў, што краіна ператварылася ў «дзяржаву поўнай апекі», дзе грамадзяне ўсё больш залежаць ад улад і пазбягаюць асабістай адказнасці.
Паводле яго слоў, без маштабных рэформ Германію чакае працяглы эканамічны спад.
«Многія заклікаюць да перамен, але калі справа даходзіць да сутнасці, ніхто не хоча, каб гэта закранула людзей. Нам патрэбныя рэформы ва ўсіх галінах, інакш мы сутыкнёмся з заняпадам эканамічнага росту, нябачаным за апошнія дзесяцігоддзі», — сказаў Мюлер.
Ён таксама выступіў за перагляд палітычнай ізаляцыі партыі «Альтэрнатыва для Германіі».
«Выбаршчыкі АдГ — гэта цалкам нармальныя людзі, якія, магчыма, раней галасавалі за ХДС або ХСС і звярнуліся да іх у адчаі», — адзначыў Мюлер.
Акрамя таго, ён прапанаваў праверыць фінансаванне няўрадавых арганізацый.
«У Германіі налічваецца каля 15 000 НКА з сотнямі тысяч супрацоўнікаў, якія ў асноўным атрымліваюць зарплату са сродкаў падаткаплацельшчыкаў. Нам павінна быць дазволена задацца пытаннем, прымальна гэта ці не», — дадаў былы дырэктар Volkswagen.
У вонкавым палітычным плане Мюлер лічыць, што Еўрасаюз у цяперашнім выглядзе занадта раздроблены і саступае ЗША і Кітаю.
Замест саюза з 27 краін ён прапануе стварыць больш шчыльнае аб’яднанне некалькіх моцных дзяржаў, уключаючы Германію, Францыю, Польшчу і Вялікабрытанію, вакол якіх магла б сфармавацца новая, больш кіраваная структура ЕС.
Цяпер чытаюць
Пальчыс, Андрэева, Лойка і іншыя імёны — пасля візіту амерыканскіх дыпламатаў у Мінск вызвалілі партыю палітвязняў7
Каментары