Блогеру Лапшыну забаранілі ўезд у Арменію. Гэтаму маглі паспрыяць і беларускія ўлады
Інцыдэнт адбыўся 5 красавіка ў аэрапорце Ерэвана. Як і раней, блогера Аляксандра Лапшына затрымалі на пашпартным кантролі, але гэтым разам паведамілі, што ўезд у краіну для яго цалкам закрыты і ён павінен з’ехаць. Пры гэтым ніякіх афіцыйных дакументаў з тлумачэннем прычын яму не далі, піша «Радыё Свабода».
Перад гэтым Лапшын спрабаваў атрымаць электронную візу па ізраільскім пашпарце, але ўпершыню атрымаў адмову. Таму ён вырашыў паляцець без яе і аформіць візу ўжо на месцы, але і там яму адмовілі. У Арменіі ў яго засталіся сябры, а таксама кватэра і асабістыя рэчы, бо раней ён жыў там некалькі гадоў.
Афіцыйна блогеру патлумачылі забарону тым, што ён апублікаваў інтэрв’ю з былым армянскім ваеннапалонным, які расказваў пра катаванні ў азербайджанскім палоне. На думку армянскага боку, такія матэрыялы могуць шкодзіць адносінам паміж Арменіяй і Азербайджанам. Сам блогер лічыць гэтае тлумачэнне нелагічным.
Неафіцыйна ж яму сказалі, што праблема можа быць у тым, што яго ўжо неаднаразова затрымлівалі ў Арменіі па запытах Беларусі, і гэта проста надакучыла мясцовым службам. Усяго такіх затрыманняў было сем.
Праблемы з беларускімі ўладамі ў Лапшына пачаліся яшчэ ў 2016 годзе, калі яго затрымалі ў Беларусі і перадалі ў Азербайджан з-за крымінальнай справы за наведванне Нагорнага Карабаху. Там блогера асудзілі, але пазней памілавалі. Пасля гэтага ён падаў скаргу ў ААН, і там прызналі, што яго правы былі парушаныя.
У наступныя гады Беларусь працягвала абвінавачваць Лапшына, і ў 2024 годзе яго ўпершыню затрымалі ў Арменіі па беларускім запыце, але не выдалі. Пазней такія затрыманні паўтараліся. Лапшын нават звяртаўся ў армянскі суд, які прызнаў, што абвінавачанні Беларусі не адпавядаюць мясцовым законам, але гэта не спыніла затрыманняў.
Цяпер, пасля поўнай забароны на ўезд, блогер кажа, што ў яго амаль не засталося юрыдычных магчымасцяў нешта змяніць. Ён накіраваў запыт армянскім уладам, каб атрымаць афіцыйнае тлумачэнне, але пакуль адказу няма.
Цяпер чытаюць
Бабарыка зоймецца бізнэсам — ужо адкрыў кампанію ў Германіі11
Бабарыка зоймецца бізнэсам — ужо адкрыў кампанію ў Германіі
«Я стаў шчаслівы». Праца на будоўлі прыносіць добрыя грошы, а грамадская актыўнасць — маральную сілу. Былы каліновец Кусь расказаў пра тое, як вярнуў унутраную раўнавагу1313
Каментары