Пра тое, што блогер Аляксандр Лапшын быў зноў затрыманы ў Арменіі на запыт беларускіх уладаў, ён сам расказаў у размове са «Радыё Свабода» ўдзень 19 сакавіка. Гэта адбылося 19 сакавіка ў ерэванскім аэрапорце, адкуль Лапшын накіроўваўся ў Страсбург.
«Я вылятаў з Ерэвана і мяне зноў затрымалі на запыт Беларусі, ужо шосты раз, — расказаў Лапшын у размове з «Радыё Свабода». — Беларусь абнавіла абвінавачанне. Таму што па ранейшым Генпракуратура Арменіі вынесла рашэнне зняць вышук. Што зрабіла Беларусь? Яны даслалі новы вышук. Па абсалютна тым жа самых абвінавачаннях — абраза Лукашэнкі, заклікі да нечага. Стандартны набор. І мяне зноў затрымалі. На гэты раз было вельмі па-хамску з боку Службы нацыянальнай бяспекі Арменіі».
Па словах Лапшына, падчас затрымання ён паспеў выклікаць паліцыю, якая прыехала ў аэрапорт праз тры гадзіны. Пасля гэтага блогера вызвалілі, аднак на свой рэйс ён спазніўся.
«Мяне вызваліла паліцыя, паліцэйскія патлумачылі, што вышук у дачыненні да мяне зняты, — расказвае Аляксандр Лапшын. — Але самалёт вылецеў без мяне. Я ляцеў у Страсбург па прававых пытаннях. Зараз зноў у Ерэване, буду набываць новыя дарагія квіткі. І падаваць іск супраць памежнай службы Арменіі. Буду патрабаваць ад іх кампенсацыі».
Папярэдняе затрыманне Лапшына адбылося вясной мінулага года. 2 мая 2025 у аэрапорце сталіцы Арменіі Ерэвана мясцовыя памежнікі паведамілі грамадзяніну Ізраіля, блогеру Аляксандру Лапшыну, што ён затрыманы на просьбу ўладаў Беларусі і мусіць паехаць у пастарунак паліцыі.
«Прыляцеў — і мяне зноў затрымалі, правёў у аэрапорце дзве гадзіны, — расказваў тады Лапшын у размове з «Радыё Свабода». — Сказалі, зноў на запыт Беларусі. Яны як робяць — крыху мяняюць абвінавачанне. Дадаюць нейкі артыкул, я нават не ведаю які. Мінулым разам было сем артыкулаў Крымінальнага кодэкса Беларусі, цяпер стала восем. І гэта, атрымліваецца, ужо іншы запыт. Дзве гадзіны прасядзеў, пасля вызвалілі. Але гэта юрыдычны тэрарызм, менавіта гэтым займаюцца ўлады Беларусі».
Праблемы ва ўзаемаадносінах з афіцыйным Мінскам пачаліся ў Аляксандра ў 2016 годзе, калі яго затрымалі ў Беларусі. Прычынай стала крымінальная справа, заведзеная на Лапшына ў Азербайджане за наведванне тэрыторыі Нагорнага Карабаха, якую на той момант Баку не кантраляваў. І хоць вызваліць Лапшына прасілі і ў Маскве, і ў Ізраілі, Мінск перадаў блогера ў Азербайджан. Там Лапшына асудзілі на тры гады, а ў верасні 2017 блогера асабіста памілаваў Ільхам Аліеў, дазволіўшы выехаць у Ізраіль.
Пасля вызвалення Аляксандр Лапшын падаў на дзеянні ўладаў Беларусі скаргу ў ААН, дзе парушэнне яго правоў прызналі, а пра дзеянні беларускіх уладаў і Аляксандра Лукашэнкі асабіста ён пісаў і гаварыў усё, што думае. Вылілася гэта ў новыя праблемы. Першы раз на запыт уладаў Беларусі ў Арменіі Лапшына затрымалі ў верасні 2024 года. Тады яму паведамілі, што Мінск яго абвінавачвае паводле сямі артыкулаў Крымінальнага кодэкса, і адпусцілі праз чатыры гадзіны. Генеральная пракуратура Арменіі афіцыйна адмовіла Беларусі ў выдачы Лапшына.
Пасля таго выпадку Аляксандр Лапшын быў у Арменіі яшчэ некалькі разоў, прыязджаў і выязджаў без праблем. Да мая 2025-га, калі пасля чарговага затрымання ў аэрапорце Аляксандр вырашыў выключыць сваё імя з «беларускага злачыннага спіса», падаўшы пазоў у армянскі суд. У лютым 2026 года армянскі суд прызнаў, што абвінавачанні Беларусі ў адрас Аляксандра Лапшына супярэчаць армянскім юрыдычным нормам, але спыніць затрыманні блогера падчас візітаў у Арменію немагчыма. А сам Лапшын можа гэта зрабіць, калі звернецца з прэтэнзіямі напрамую да ўладаў Беларусі.
Той самы масажыст расказаў, навошта здымаў голых кліентак2
Каментары