Выйшаў трэці сезон любімага беларусамі серыяла пра шляхту — вось чым здзіўляе «1670». Там зняліся і беларусы
Мала што з польскіх кінапраектаў так спадабалася беларусам, як нэтфліксаўскі серыял «1670». Прайшлі ўжо два сезоны шляхетнай камедыі — што чакаць у трэцім?
Шляхетнасць — галоўнае, што ёсць у жыцці Яна Паўла Адамчэўскага, частковага ўладара польскай вёскі Адамчыха. Быць польскім шляхцічам для яго ўвогуле вяршыня эвалюцыі.
Цягам двух сезонаў праекта «1670» гэты яркі герой у выкананні Барталамея Топы дэманстраваў, як тая шляхетнасць працуе: матываваў сялян працаваць бясплатна, забараняў марш роўнасці, арганізаваны яго дачкой, і ладзіў міжнародную дыпламатыю з туркамі, не ведаючы іх мовы.
Наступствы падалі і на яго, і на яго сям’ю. Напрыклад, на жонку, верніцу і аскетку Зоф’ю, якая мае свае сакрэты, ці на дзяцей. З першынцам Станіславам не атрымалася — вырас гультаём, а вось малодшы сын Якуб зарабляе добрыя грошы як каталіцкі святар. Але сэрцы гледачоў скрала Анэля, разумная дзяўчына і ледзь не першая польская феміністка, якая чамусьці звязалася з праваслаўным ліцвінам Мацеем.
5 жніўня на Netflix выйшаў трэці сезон «1670». Мінулы сезон скончылі на тым, што ў Адамчысе адсвяткавалі Дажынкі — на тое свята Ян Павел выдаткаваў шалёныя, а то і апошнія грошы. І ўсё б добра, але Якуб наносіць бацьку ўдар у спіну. Ён выкрывае, што такі важны для Яна Паўла шляхетны статус здабыты праз падман продкаў іх сям’і, і Ян Павел застаецца і без грошай, і без шляхетнасці.
То і не дзіва, што Анэля, калі вяртаецца ў вёску з падарожжа, знаходзіць бацькоў у дэпрэсіі. Калі дакладней, гора-шляхцічы ў Адамчысе пакутуюць на постшляхетны стрэсавы разлад — пародыя на посттраўматычны стрэсавы разлад (ПТСР), які часта дыягнастуюць сёння.
Але аказваецца, што не ўсё страчанае, і шляхетнасць можна вярнуць. Калі Ян Павел разумее гэта, ён кідаецца з галавой у барацьбу за статус. Гэта давядзе яго да каралеўскага палаца ў Варшаве, дзе пана Адамчэўскага чакаюць вялікія інтрыгі, да пабудовы касмічнага карабля і праблем у яго ўласнай вёсцы. Дарэчы, пра карабель: чакайце ў серыяле Казіміра Семяновіча, знакамітага беларуса, вельмі важнага для гісторыі ракетабудавання.
Не забудзем і пра Мацея. Прыгонны ліцвін пакідае Адамчыху, і ў канцы 2 сезона Анэля спрабуе яго знайсці. Але ж Мацей сустракае ў падарожжах не яе, а ўкраінскіх казакаў і сярод іх так званага Ляхажэрца — украінскага нацыяналіста з падазрона знаёмым тварам. Той Ляхажэрац прызнае, што чамусьці ведае польскую нашмат лепш, чым украінскую, але пры гэтым ненавідзіць палякаў і адмаўляецца паверыць, што можа быць з імі звязаны.
Складана не заўважыць, што сюжэтная лінія пра ўкраінцаў з’явілася ў часы, калі польска-ўкраінскія адносіны перажываюць вялікі крызіс і ў Польшчы растуць праявы ксенафобіі. Палітычны скандал разгарнуўся і ў маі 2026‑га, калі Зяленскі даў падраздзяленню УСУ імя героеў УПА — прэзідэнт Польшчы Караль Наўроцкі ў адказ на гэта пазбавіў Зяленскага польскага Ордэна Белага Арла. Так што атрымалася актуальна, але і далікатна, тым больш калі ўлічыць, што галоўны «ляхажэрац» — усё ж такі не ўкраінец.
Некаторых з тых казакаў, дарэчы, гралі беларусы. За велізарнымі вусамі хаваюцца ўдзельнікі гурта Kasary, які выконвае традыцыйныя мужчынскія спевы, у тым ліку і яго лідар Сяржук Доўгушаў.
Пра гэта ў інстаграме расказаў спявак Аляксандр Драгавоз:
«Мне дзеля гэтага давялося пайсці на ахвяры і згаліць вусы з барадой, якія я насіў літаральна палову жыцця. Мы гралі ўкраінскіх казакаў, якія спяваюць і лупяць у велічэзны бубен. Гэта была адна з самых вясёлых прыгод мінулага лета».
Новы сезон спадабаецца і старым фанатам серыяла, і неафітам у сусвеце Яна Паўла. Рэйтынгі праекта пакуль толькі пачалі фармавацца, але ўжо можна сказаць, што трэці сезон не правальны. Напрыклад, на рэсурсе IMDb першыя 4 серыі сезона (усяго іх 8) маюць рэйтынгі, параўнальныя з мінулым сезонам — ад 7,1 да 7,7 балаў з 10.
Але ж, калі назіраеш за беганінай шляхцічаў па Адамчысе, не пакідае адчуванне, што ўсё асноўнае гэты праект ужо сказаў. Нечым здзівіць усё складаней, і стваральнікі серыяла шукаюць спосабы даць гэтаму рады: выдаткоўваюць грошы на здымкі і прапрацоўку дэталяў, спрабуюць не адставаць ад трэндаў у грамадстве і дасціпна іх высмейваць.
Але гэта ўжо не прарыўное шоу, а хутчэй утульны і па-мінуламу смешны камедыйны міжсабойчык з сапраўды таленавітымі польскімі акцёрамі.
«Наша Нiва» — бастыён беларушчыны
ПАДТРЫМАЦЬ
Той самы масажыст расказаў, навошта здымаў голых кліентак2
Каментары