У Беларусі распрацавалі лекавыя плёнкі, якія могуць замяніць таблеткі і ўколы
Маладыя навукоўцы Беларускага дзяржаўнага ўніверсітэта стварылі новы від лекавых сродкаў — спецыяльныя плёнкі, якія раствараюцца ў роце. Яны выглядаюць як тонкія палоскі і ўтрымліваюць вітаміны, раслінныя дабаўкі або лекі, піша sb.by.
Асаблівасць гэтай распрацоўкі ў тым, што дзейнае рэчыва трапляе ў арганізм адразу праз слізістую абалонку рота, абмінаючы страўнік і печань. Дзякуючы гэтаму эфект наступае вельмі хутка. Плёнкі раствараюцца за некалькі секунд і не патрабуюць запівання вадой.
Такі фармат асабліва зручны ў сітуацыях, калі патрэбная хуткая дапамога — напрыклад, пры болі, алергіі, кашлі, дыярэі або марской хваробе. Таксама ён пасуе дзецям, пажылым людзям і тым, хто мае цяжкасці з глытаннем.
Распрацоўшчыкі адзначаюць, што гэтыя плёнкі могуць стаць альтэрнатывай звычайным таблеткам, сіропам і ўколам, якія не заўсёды зручныя або маюць абмежаванні ў выкарыстанні.
Пры вытворчасці выкарыстоўваюцца біяраскладальныя матэрыялы, што адпавядае прынцыпам экалагічнай хіміі. Тэхналогія ўжо прыстасаваная да прамысловага выпуску, хоць у Беларусі такіх вытворчасцяў пакуль няма, таму праект лічыцца ўнікальным.
Цяпер навукоўцы працуюць над пашырэннем складу і паляпшэннем смаку плёнак, бо некаторыя кампаненты маюць горкі прысмак. Ужо створаныя варыянты з супрацьвірусным, супрацьалергічным, супрацьдыярэйным дзеяннем, а таксама сродкі, што дапамагаюць пры кашлі.
Распрацоўку зрабілі маладыя даследчыцы Таццяна Бязносік і Марыя Гуновіч разам з навуковымі кіраўнікамі Дзмітрыем Грыншпанам і Марыяй Савіцкай. Праект ужо атрымаў высокую ацэнку на конкурсе медыцынскіх стартапаў, і ім зацікавіліся беларускія фармацэўтычныя прадпрыемствы. Гэта дае шанец, што ў будучыні такія плёнкі пачнуць выпускаць і шырока выкарыстоўваць.
«Мы даём Штатам тое, што яны хочуць». Расійскі канал апублікаваў відэа, якое называюць запісам Рыжанкова схаванай камерай у машыне14
Каментары