Звязаны з атачэннем Лукашэнкі бізнэсмен павялічыў даходы ва Украіне і атрымаў украінскі пашпарт
Грамадзянін Арменіі і Беларусі Артур Гранц, фігурант расследаванняў літоўскіх і ўкраінскіх журналістаў аб развіцці бязмытнага гандлю ў аэрапортах і кантрабандзе беларускага тытуню, павялічыў свой даход ад бізнэсу ва Украіне, заўважыла «Радыё Свабода».
Як вынікае са складзенага ўкраінскім рэсурсам Opendatabot рэйтынгу, Артур Гранц у 2025 годзе нарасціў даход сваіх кампаній на 6,28% — да 607 668 575 грыўняў (13 810 649 даляраў у эквіваленце).
У агульным рэйтынгу ўкраінскіх бізнэсоўцаў сёлета ён заняў 2 698 месца і страціў 91 пункт, а ў кіеўскім рэйтынгу ён — на 730 месцы (страціў 24 пункты).
Ва Украіне Артур Гранц мае 12 кампаній. Ён уласнік толькі адной з іх, у іншых 11 ён бенефіцыяр. Кампаніі працуюць адразу ў некалькіх сектарах — у бязмытным гандлі алкаголем, у рознічным гандлі адзеннем, у друку часопісаў і выданняў, у камп’ютарных паслугах, у рэстараннай дзейнасці, у арэндзе нерухомасці.
Сёлета 30 сакавіка літоўскае выданне LRT апублікавала вынікі расследавання, згодна з якім Гранц фінансуе рэжым Лукашэнкі праз развіццё сеткі крам бязмытнага гандлю і пры гэтым бесперашкодна развівае бізнэс у Літве. Згодна з расследаваннем, ён валодае адным з самых дарагіх рэстаранаў Вільні HeJi і раскошным гатэлем Esperanza Resort у Троках.
У 2024 годзе ўкраінская грамадская арганізацыя «НОН-СТОП» спрабавала праз суд дабіцца завядзення крымінальнай справы супраць Артура Гранца за незаконны гандаль цыгарэтамі і алкаголем. Паводле слоў актывістаў, бізнэсовец за час поўнамаштабнай вайны Расіі супраць Украіны стаў «адзіным лідарам продажу цыгарэт праз сістэмы Duty Free». Арганізацыя назвала яго «каралём кантрабанды».
Ва Украіне беларус Артур Гранц жыў на падставе дазволу на жыхарства, але ў 2021 годзе выехаў з Украіны ў Іспанію, дзе мае нерухомасць. Цяпер, як вынікае з рэйтынгу ўкраінскіх бізнэсменаў, ён мае і ўкраінскі пашпарт. Раней было вядома толькі пра яго беларускае і армянскае грамадзянства.
Прадпрымальнік, звязаны з атачэннем Лукашэнкі, валодае адным з самых дарагіх рэстаранаў у Вільні і гатэлем у Троках
Нямецкі ўладальнік крамаў Duty Free у аэрапортах Літвы вядзе бізнэс і ў Беларусі
Ва Украіне актывісты патрабуюць расследаваць дзейнасць беларускага «караля кантрабанды»
Саўладальнік найбуйнейшай беларускай сеткі крамаў duty-free купляе ўкраінскі часопіс «Фокус»
Цяпер чытаюць
Чым цяпер займаюцца дзяўчаты, якіх летась назвалі самымі прыгожымі ў Беларусі?8
Чым цяпер займаюцца дзяўчаты, якіх летась назвалі самымі прыгожымі ў Беларусі?
Містычнае кола Вільні: Каліноўскі быў пахаваны з медальёнам святыні, каля якой вырас гатычны палац доктара з-пад Оршы. Цяпер парэшткі Каліноўскага перапахавалі ў магільні таго ж доктара2121
Каментары