У аэрапорце Бангкока злавілі сцюардэсу, якая спрабавала правезці пад адзеннем 30 чарапах
Кантрабандыстцы пагражае да 10 гадоў турмы.
У міжнародным аэрапорце Суварнабхумі ў Бангкоку мытнікі зрабілі знаходку, якая здзівіла і шакавала нават дасведчаных супрацоўнікаў. Яны спынілі 19‑гадовую дзяўчыну з Тайваня, якая збіралася вылецець у Тайбэй — і знайшлі 30 жывых чарапах, схаваных у яе пад адзеннем.
Як паведамляе Bild са спасылкай на Bangkok Post, жывёлы былі прымацаваныя да цела скотчам і змешчаны ў невялікія мяшочкі. Верагодна, так кантрабандыстка спрабавала пазбегнуць выяўлення чарапах пры звычайнай праверцы багажу. Сканеры цела не заўсёды даюць гэтак жа выразныя выявы, як сканеры багажу. На гэта, відавочна, і быў разлік. Гаворка ідзе пра індыйскіх зорчатых чарапах (Geochelone elegans) — від строга ахоўваецца, таму запатрабаваны на чорным рынку.
Для жывёл такі спосаб перавозкі азначае гадзіны пакут. У іх амаль няма паветра, няма вады, яны не могуць рухацца. Многія задыхаюцца, атрымліваюць траўмы ці паміраюць ад стрэсу. У некаторых краінах Азіі індыйскіх зорчатых чарапах лічаць экзатычнымі хатнімі гадаванцамі. На чорным рынку кошт можа дасягаць сотняў ці тысяч еўра за адну жывёлу.
Для затрыманай, якая, як паведамляецца, працуе бортправадніцай у в'етнамскай авіякампаніі, гэта можа мець сур'ёзныя наступствы. У Тайландзе дзейнічае закон аб захаванні і ахове дзікай прыроды. За незаконнае валоданне ці вываз відаў, якія ахоўваюцца, пагражае да 10 гадоў пазбаўлення волі і/або штраф да аднаго мільёна бат (прыкладна 25 тысяч еўра).
30 індыйскіх зорчатых чарапах канфіскаваныя і перададзеныя спецыялістам.
Цяпер чытаюць
Пасля беларускай вёскі Шнайдэраў больш не бянтэжыць пытанне ЛГБТ. Сям'я з Германіі, якая стала героямі прапаганды, вяртаецца ў ЕС27
Каментары