Падняты каўнер пола быў адной з самых пазнавальных дэталяў 2000-х, а пасля надоўга ператварыўся ў моднае клішэ. Цяпер яго зноў носяць знакамітасці і выкарыстоўваюць у сваіх калекцыях вядомыя дызайнеры. Але ёсць нюанс: сёння гэта выглядае не зусім так, як дваццаць гадоў таму.
Падняты каўнер пола асабліва запомніўся па модзе 2000-х. Ён добра ўпісваўся ў папулярны тады стыль, натхнёны гардэробам студэнтаў прэстыжных амерыканскіх каледжаў: пола, кашулі, блэйзеры, джэмперы і лоферы.
Адным з самых вядомых прыхільнікаў такога вобраза быў Канье Уэст. У часы свайго дэбютнага альбома The College Dropout ён насіў яркія пола, блэйзеры і рэчы ў студэнцкім стылі, часта падымаючы каўнер.
З часам гэтая дэталь стала настолькі характэрнай для эпохі, што ператварылася ў клішэ. Падняты каўнер пачаў асацыявацца з гольф-клубамі, багатымі студэнтамі і моднымі празмернасцямі нулявых — і паступова амаль знік.
Але апошнім часам ён зноў пачаў з'яўляцца. Як піша Heute.at, адной з першых прыкмет вяртання трэнду стаў вобраз брытанскага спявака Гары Стайлза, вядомага сваімі моднымі эксперыментамі. У сакавіку 2025 года яго сфатаграфавалі ў Лондане ў ружовым пола з паднятым каўняром. Vogue тады нават прысвяціў гэтаму асобны матэрыял, задаўшыся пытаннем, ці не вяртаецца мода на паднятыя каўняры.
Пасля падобныя вобразы сталі з'яўляцца і ў дызайнерскіх калекцыях Auralee, Jil Sander, Dior і Gucci. Такім чынам, гаворка ўжо не пра адзін выпадковы вобраз, а пра дэталь, да якой адначасова вяртаюцца розныя дызайнеры і знакамітасці.
Але ёсць адно адрозненне паднятых каўняроў раней і цяпер
У нулявыя каўнер звычайна падымалі цалкам і стараліся, каб ён стаяў роўна. Цяпер такая акуратнасць якраз неабавязковая.
Адна частка каўняра можа застацца паднятай, другая — апусціцца. Ён можа быць крыху пакамечаны або стаяць няроўна. Замест падкрэслена акуратнага выгляду — наўмысная нядбайнасць.
Таму цяперашняе вяртанне — не дакладная копія моды дваццацігадовай даўніны. Дызайнеры бяруць пазнавальную дэталь нулявых, але пазбаўляюць яе той стараннай акуратнасці, з якой яна калісьці асацыявалася.
І для таго, каб паспрабаваць новы-стары трэнд, нават не абавязкова нешта купляць. Калі ў шафе захавалася пола са шчыльным каўняром, дастаткова проста падняць яго. Прычым цяпер чым менш відаць, што вы стараліся, тым лепш.
Цяпер чытаюць
Герой Беларусі Марына Васілеўская нарадзіла дачку ад касманаўта Алега Навіцкага26
Каментары