Японія паспяхова запусціла місію да спадарожнікаў Марса
Японія паспяхова запусціла касмічны апарат MMX, які павінен дасягнуць Фобаса — аднаго са спадарожнікаў Марса, — і ўзяць пробы грунту з яго паверхні. У склад місіі таксама ўваходзіць невялікі франка-нямецкі марсаход «Ідэфікс», паведамляе Deutsche Welle.
Японскае агенцтва аэракасмічных даследаванняў (JAXA) паведаміла пра паспяховы запуск ракеты H3 з апаратам MMX. Старт адбыўся ў аўторак, 20 кастрычніка, з касмадрома на востраве Танэгасіма.
MMX — гэта скарачэнне ад англійскай назвы Martian Moons Exploration, што азначае «Даследаванне спадарожнікаў Марса». Маса апарата складае пяць тон. Вярнуцца на Зямлю ён павінен у 2031 годзе. Палёт да арбіты Фобаса і назад зойме прыкладна па адным годзе ў кожны бок.
Місія разлічаная на пяць гадоў. Тры з іх апарат правядзе на арбіце, даследуючы Фобас і Дэймас — другі спадарожнік Марса. Іх дыяметры складаюць усяго каля 20 і 10 кіламетраў адпаведна. Прадугледжаныя таксама пасадкі на Фобас для вывучэння яго паверхні і збору ўзораў грунту. Спачатку на спадарожнік павінен апусціцца невялікі аўтаномны марсаход, а затым — сам апарат MMX.
Кошт праекта ацэньваецца ў 578 мільёнаў даляраў. У ім удзельнічаюць Японія, ЗША, Францыя, Германія і Еўрапейскае касмічнае агенцтва. Францыя і Германія сумесна распрацавалі марсаход «Ідэфікс», названы ў гонар сабакі з коміксаў пра Астэрыкса і Абелікса.
Чатырохколавы марсаход памерам з мікрахвалевую печ павінен першым прызямліцца на Фобасе і правесці там каля 100 дзён. Ён будзе перасоўвацца з хуткасцю ўсяго адзін міліметр за секунду. Сам апарат MMX застанецца на паверхні прыкладна на дзве гадзіны, каб сабраць 10 грамаў грунту.
Раней СССР, а пасля Расія тройчы спрабавалі адправіць да Фобаса касмічныя апараты, якія павінны былі прызямліцца на яго паверхні. Дасягнуць спадарожніка Марса і перадаць на Зямлю здымкі ўдалося толькі апарату «Фобас-2» у 1989 годзе. Аднак ніводная з тых місій не завяршылася паспяховай пасадкай.
Герой Беларусі Марына Васілеўская нарадзіла дачку ад касманаўта Алега Навіцкага
Apple абнавіла спадарожнікавыя здымкі Мінска. Цяпер гэта самыя свежыя касмічныя здымкі сталіцы
Starship Ілана Маска ўпершыню выйшаў на арбіту Зямлі
Навукоўцы прыдумалі, як можна вырошчваць ежу на Марсе
ЗША ўпершыню прызналі, што размясцілі зброю ў космасе
Малодшы сын Сахашчыка абвешчаны зніклым без вестак. Выглядае, ён ваяваў за Расію88
Каментары