Генэральная пракуратура Беларусі праверыць парадак выкананьня законнасьці пры расьсьледаваньні крымінальнай справы пра падзеі 19 сьнежня, перад тым, як гэта справа будзе накіраваная ў суд. Пра гэта заявіў журналістам генпракурор Рыгор Васілевіч.
Генпракурор адзначыў, што расьсьледаваньнем крымінальнай справы аб масавых беспарадках займаецца «сьледчая група, у якую ўвайшлі супрацоўнікі МУС і КДБ», перадае Інтэрфакс.
«Дадзеная крымінальная справа знаходзіцца ў вытворчасьці сьледчай управы ГУУС Менска, а нагляд за расьсьледаваньнем вядзе пракуратура Менска», — паведаміў Васілевіч.
Адносна доступу адвакатаў да абвінавачаных, генпракурор адзначыў, што кожная асоба, якая знаходзіцца пад сьледзтвам, мае права на адваката, абвінавачаныя і падазраваныя павінны быць забясьпечаны адвакатамі.
Ён паведаміў, што «31 сьнежня прадстаўнік Генпракуратуры Беларусі наведваў у СІЗА КДБ затрыманых па гэтай справе, скаргаў не паступала».
Паводле Васілевіча, што «тая асоба, якую наведваў прадстаўнік Генпракуратуры, падпісала паперу пра тое, што ў яго няма скаргаў».
Закранаючы пытаньне пра паказаньні абвінавачанымі, Васілевіч адзначыў, што «яны маюць права не даваць паказаньні, даваць тыя паказаньні, якія лічаць магчымымі».
Цяпер чытаюць
Хто такі Мацвей Бяляй, якога нібыта дэпартавалі ў Беларусь? Расказваем гісторыю дзіўнага актывіста з падазроным мінулым1
Каментары