Яраслаў Раманчук жэніцца, а замест пярсцёнка дорыць жонцы ноўтбук
Аднак са свайго вяселля эканаміст шоу рабіць не хоча.
Аднак са свайго вяселля эканаміст шоу рабіць не хоча.
На вяселле не запрашаюць ні журналістаў, ні фотарэпарцёраў. Яраслаў Раманчук тлумачыць гэта нежаданнем будучай жонкі ператвараць вяселле ў публічную падзею. Яго абранніцу завуць Алеся і гэта амаль усё, што аб ёй вядома. У цырымоніі возьмуць удзел каля 60 гасцей. Пасля касцёла ўсе яны адразу накіруюцца ў рэстаран.
Яраслаў Раманчук выбраў для сваёй будучай жонкі не зусім звычайны вясельны падарунак. Замест пярсцёнка яна атрымае ад яго ноўтбук. «Мы людзі практычныя і лічым, што камп'ютар — значна больш карысная рэч, чым розныя цацкі», — кажа Яраслаў.
Але заручальныя пярсцёнкі таксама будуць. Яраслаў і Алеся куплялі іх не ў Беларусі, а заказвалі ў Польшчы.
— Там танней, і золата добрае, і выбар выдатны, і дызайн сучасны, —канстатуе факт Раманчук. — Мы выбралі пярсцёнкі з невялікімі дыяменцікамі.
Сукенка нявесты — з апошняй італьянскай калекцыі. Жаніх на вясельную цырымонію таксама апране касцюм небеларускай вытворчасці.
— Слава, скажы шчыра: не страшна развітвацца са свабодай і незалежнасцю?
— Я не лічу, што шлюб — гэта аўтаматычнае развітванне са свабодай. Мне здаецца, наадварот. У шлюбе свабода іграе новымі фарбамі.
Амаль адразу пасля ўрачыстасці Яраслаў і Алеся адправяцца ў вясельнае падарожжа.
— У мяне ёсць сябар у Варшаве, у якога свая турыстычная фірма, — дзеліцца планамі эканаміст. — І мы збіраемся паехаць на адпачынак з Варшавы па "палаючай" пуцёўцы. З краінай пакуль не вызначыліся, але адназначна гэта будзе не Турцыя. Магчыма, Грэцыя. Наша галоўная ўмова — каб там не было занадта вялікага наплыву п'яных турыстаў.
Каментары