Гомельскія праваабаронцы падалі заяўкі на правядзенне пікетаў у падтрымку Алеся Бяляцкага
На 22 жніўня гомельскія праваабаронцы Анатоль Паплаўны, Леанід Судаленка і Віктар Адзіночанка заявілі пікеты ў найбольш шматлюдных месцах абласнога цэнтра. Яны плануюць звярнуць увагу гараджан на прымяненне крымінальнага заканадаўства для палітычнай расправы над кіраўніком незарэгістраванага праваабарончага цэнтра «Вясна»,
Як паведаміў юрыст Леанід Судаленка, 6 жніўня праавабаронцы адправілі заяўкі ў гарвыканкам заказнымі лістамі.
Выбраныя тры месцы для пікетаў: цэнтральны рынак, пляцоўкі перад універмагам «Гомель» і гандлёвым домам «Рэчыцкі».
«У любым дэмакратычным грамадстве такія няўрадавыя арганізацыі, як „Вясна“, адыгрываюць значную ролю. Прызнаючы гэтую ролю, дзяржавы свету заканадаўча забяспечваюць умовы, неабходныя для працы і росквіту трэцяга сектара, а не імкнуцца маргіналізаваць грамадзянскую супольнасць, адмаўляючы ў рэгістрацыі, пераследуючы і затрымліваючы актывістаў няўрадавых арганізацый», — напісалі ў сваіх заяўках у Гомельскі гарвыканкам праваабаронцы.
Крымінальную справу ў дачыненні да Алеся Бяляцкага гомельскія праваабаронцы ўспрымаюць як расправу і помсту за яго шматгадовую праваабарончую дзейнасць, а таксама як імкненне знішчыць цэнтр «Вясна» і запалохаць увесь праваабарончы рух у Беларусі.
Праваабаронцы таксама заклікаюць грамадзянскую супольнасць Гомельскай вобласці падтрымаць іх ініцыятыву, у масавым парадку пратэставаць супраць прымянення крымінальнага заканадаўства ў дачыненні да Бяляцкага, а таксама вылучаць патрабаванні да ўлады аб спыненні ўсіх рэпрэсій адносна апазіцыйных няўрадавых арганізацый і іх актывістаў, патрабаваць вызвалення ўсіх палітзняволеных у Беларусі.
Каментары