Галоўная мэта — зрабіць празрыстым і кантраляваным падлік бюлетэняў.
Дзмітрый Ус — былы кандыдат у прэзідэнты — пачынае кампанію за перагляд выбарчага заканадаўства. Ён лічыць, што без гэтага зрабіць будучыя выбары ў краіне празрыстымі і свабоднымі немагчыма.
Дзмітрый Ус сёння паведаміў, што змены ў Выбарчы кодэкс ужо падрыхтаваныя.
Галоўная мэта — зрабіць празрыстым і кантраляваным падлік бюлетэняў.Таму прапануецца наступнае:
«Каб кандыдаты ў прэзідэнты і іх давераныя асобы, а таксама кандыдаты ў дэпутаты ўсіх роўняў атрымалі права пасылаць ва ўчастковыя выбарчыя камісіі сваіх прадстаўнікоў з правам быць сябрамі ўчастковых камісій. Такім чынам у камісіях з’явяцца незалежныя людзі.
Яны будуць лічыць бюлетэні і падпісваць іх з абодвух бакоў. Так будзе наладжаны кантроль за падлікам галасоў выбарцаў».
Дзейнае заканадаўства прадугледжвае магчымасць уносіць змены ў Выбарчы кодэкс — канстатуе сакратар Цэнтральнай выбарчай камісіі Мікалай Лазавік:
«Для таго, каб ажыццявіць заканатворчую ініцыятыву грамадзян, патрэбна спачатку зарэгістраваць ініцыятыўную групу і тое пытанне, якое будзе выносіцца на разгляд парламента. Ну, а далей ініцыятыўная група збірае подпісы грамадзянаў. І калі яна атрымае неабходную падтрымку, то ўносіць законапраект у парламент.
А там дакумент разглядаецца ў звычайным парадку. І ў выніку ён можа быць альбо прыняты, альбо адхілены».
Дзмітрый Ус кажа, што яго каманда мае намер сабраць не меней за 100 тысяч подпісаў для таго, каб дамагчыся змены выбарчага заканадаўства:
«Ужо па рэгіёнах прызначаныя прадстаўнікі, якія зоймуцца справай у абласцях і раёнах. Практычна ўжо ёсць, я думаю, больш за тысячу чалавек. Гэта каманда, якая збірала подпісы, калі я быў кандыдатам у прэзідэнты. Яна засталася. І да яе, я мяркую, падключацца актывісты некаторых іншых былых кандыдатаў у прэзідэнты. А таксама людзі, якія неабыякавыя да лёсу сваёй краіны».
Між тым 18 кастрычніка Аляксандр Лукашэнка ўжо абмяркоўваў планы правядзення выбарчай кампаніі 2012 года ў Палату прадстаўнікоў са старшынёй ЦВК Лідзіяй Ярмошынай.
І заявіў пра недапушчальнасьць змянення выбарчага заканадаўства:
«Я б не стаў разглядаць варыянты, як ад нас сёння некаторыя патрабуюць, ломкі выбарчага заканадаўства. Гэта абсалютна непрымальна напярэдадні палітычнай кампаніі», — падкрэсліў Лукашэнка.
Дарэчы, у студзені 2012 года заканчваюцца паўнамоцтвы цяперашняга складу Цэнтральнай выбарчай камісіі. Згодна з заканадаўствам, да гэтай даты павінны быць названыя прозвішчы ўсіх 12 пастаянных сябраў камісіі новага складу.
Цяпер чытаюць
Анжаліку Мельнікаву бачылі ў Мінску ў «Дана Моле»40
Каментары