Парк авіяцыі не папаўняўся
Прэс-служба прэзідэнта і «Белавія» не каментуюць інфармацыю аб куплі Беларуссю самалёта былога прэзідэнта Туркменістана.
Прэс-служба прэзідэнта і нацыянальная авіякампанія «Белавія» не каментуюць інфармацыю аб куплі Беларуссю самалёта Boeing-767-300ER былога прэзідэнта Туркменістана Сапармурата Ніязава.
У прэс-службе «Белавія» паведамілі, што парк грамадзянскай авіяцыі кампаніі не папаўняўся, а даваць каментары наконт прэзідэнцкага самалёта не могуць, бо займаюцца «выключна абслугоўваннем грамадзянскіх самалётаў».
Кіраўнік прэс-службы прэзідэнта Беларусі Павел Лёгкі сказаў БелаПАН, што не можа каментаваць гэтую інфармацыю, «бо прэс-служба не мае ніякага дачынення да дзяржзакупак».
Інфармацыю аб тым, што «Белавія» і Turkmenistan Airlines заключылі дагавор аб продажы беларускаму боку былога ва ўжыванні самалёта Boeing-767-300ER распаўсюдзіў 18 мая апазіцыйны інтэрнэт-рэсурс charter97.org са спасылкай на свае крыніцы ў беларускай авіякампаніі.
Самалёт з серыйным заводскім нумарам 33968/926 раней насіў рэгістрацыйныя знакі EZ-A700 і служыў у якасці прадстаўнічага транспарту прэзідэнта Ніязава. Пасля яго смерці ў снежні 2006 года паветранае судна засталося ва ўрадавым авіяатрадзе Туркменістана, аднак наступны прэзідэнт Гурбангулы Бердымухамедаў на ім не лятаў.
Дамоўленасць аб куплі/продажы самалёта нібыта была дасягнутая падчас візіту Бердымухамедава ў Мінск, які адбыўся 27–28 красавіка.
Інфармацыя крыніцы пацвердзілася і ў міжнародным авіяцыйным рэестры, дзе ёсць наступны запіс: «Boeing 767-32K 33968 926 EW-001PB Belavia ferried 08 may 12 ASB-SAW, for VIP use ex EZ-A700». Як вынікае з запісу, самалёт набыты менавіта для перавозкі VIP-персоны і яму прысвоены рэгістрацыйныя занкі EW-001PB.
Першы «Боінг» Лукашэнкі, 737-800BBJ у мадыфікацыі Business Jet, мае рэгістрацыйны знак EW-001PA, які адрозніваецца ўсяго на адну літару.
Як адзначае charter97.org, цана Boeing-767-300ER на міжнародным рынку складае ад 124 да 160 мільёнаў долараў у залежнасці ад мадыфікацыі. Аднак «Боінг» Ніязава быў эксклюзіўна выраблены ў VIP-варыянце: у аддзелцы салона прыменена натуральная скура і каштоўныя пароды дрэва, а сантэхніка ў душавой і прыбіральнях выканана з выкарыстаннем каштоўных металаў і камянёў.
Акрамя таго, самалёт нябожчыка Туркменбашы абсталяваны ўсімі вядомымі відамі ўрадавай сувязі (у тым ліку спадарожнікавай), сістэмай прадухілення паражэння ракетамі класа «зямля-паветра» і «паветра-паветра», а таксама забяспечаны парашутным абсталяваннем.
Паводле звестак charter97.org, цяпер куплены самалёт адпраўлены на перафарбоўку ў Франкфурт-на-Майне.
Каментары