Першы этап Усходне-Еўрапейскага чэмпіянату па дрыфтынгу «Burn дрыфт Мінск» пройдзе 2–3 чэрвеня на тэрыторыі сталічнага аэрапорта «Мінск-1».
Як паведаміў прэс-сакратар спаборніцтваў Даніла Далматаў, аўтамабільнае шоу збярэ на старце прыкладна 50 аўтамабіляў спрактыкаваных гоншчыкаў з розных краін. 2 чэрвеня адбудуцца трэніровачныя заезды, аднак у гэты дзень уваход на тэрыторыю аэрапорта для гледачоў будзе абмежаваны. Сачыць за падзеямі можна будзе ў рэжыме рэальнага часу ў інтэрнэце на сайце арганізатараў спаборніцтваў www.drift.by. Вечарам таго ж дня пройдзе парад удзельнікаў па вуліцах Мінска.
Паводле слоў Далматава, 3 чэрвеня аматары аўтаспорту змогуць увачавідкі назіраць за прыгожай барацьбой на трасе аэрапорта. У гэты дзень гоншчыкі вызначаць наймацнейшых у кваліфікацыйных заездах, а пераможца вызначыцца ў парных заездах.
Дрыфтынг — від аўтаспорту, які характарызуецца праходжаннем паваротаў з наўмысным зрывам задняй восі і праходам у кіраваным заносе на максімальна магчымай для ўтрымання на трасе хуткасці. Гэта вельмі эфектнае і відовішчнае спаборніцтва.
Спаборніцтвы па дрыфтынгу ў Беларусі праводзяцца з 2009 года сіламі беларускай каманды Racing.by.
Усходне-Еўрапейскі чэмпіянат па дрыфтынгу (EEDC) — гэта адкрыты чэмпіянат, у якім бяруць удзел лепшыя аўтагоншчыкі з краін Еўропы. У новым сезоне чэмпіянат праходзіць у Беларусі, Латвіі, Літве, Расіі, Украіне, Венгрыі і Польшчы.
БелаПАН
Хочаш падзяліцца важнай інфармацыяй ананімна і канфідэнцыйна?
Пішыце рэдактару «Нашай Нівы» ў ТГ