Больш за 20 рабочых завода жалезабетонных вырабаў занеслі начальству петыцыю, што не хочуць працаваць у суботу.
Дырэктар петыцыю парваў, а патрабаванне рабочых праігнараваў.
Пра канфлікт на заводзе ЖБВ паведамілі работніцы, якія папрасілі не называць іх імёнаў. Жанчыны скардзяцца, што адміністрацыя прадпрыемства прымушае працаваць іх у суботы:
«У пятніцу літаральна нам абвясцілі, што працоўная субота. Кранаўшчыкі — з трыццаці чалавек дзесьці 24 чалавекі — падпісаліся, што на працу не выйдуць. Занеслі ў прыёмную дырэктару, а дырэктар паперу парваў».
Жанчына кажа, што ўжо каторую суботу яны мусяць працаваць. Начальства абгрунтоўвае гэта «вытворчай неабходнасцю».
Пасля таго як начальнік адмовіўся адмяніць працоўную суботу, рабочыя параіліся і вырашылі выйсці на працу. Жанчына кажа, што падпісантамі звароту да начальства былі ў асноўным жанчыны, і яны збаяліся страціць працу:
«Яны кажуць, што калі не выйдзем, то пазвальняюць, а там за плотам, маўляў, шмат людзей… Таму выйшлі, бо звольняць. А дзе жанчыне ў Мікашэвічах знайсці працу?»
Другая жанчына кажа, што ўціск з боку начальства ўжо даводзіць рабочых да мяжы цярпення:
«Я ўжо працую 15 гадоў на гэтым прадпрыемстве. Начальства што хоча, тое і вырабляе. Як яны з намі размаўляюць! Нават даходзіць да таго, што мы павінны ў прыбіральню хадзіць, адпрошваючыся ў майстра, а калі майстра не знайшлі, то мы павінны свае патрэбы спраўляць проста ў пралёце…»
Жанчыны кажуць, што цяпер вырашаюць, як будуць рэагаваць, калі зноў субота будзе працоўнай.
Пракаментаваць сітуацыю мы папрасілі начальніка
«Жанчыны ў нас пісалі гэтую паперу, але гэтую паперу разгледзеў дырэктар і даў каманду разгледзець расцэнкі, каго там не задавальняе… У канцы месяца гэта падрэгулююць, я так думаю. Як у суботу выходзяць, то аплата лічыцца ў падвойным памеры. А так з аплатай там пытанне чыста ўзнікала».
Кіраўнік суполкі незалежнага прафсаюзу на прадпрыемстве «Граніт» у Мікашэвічах Алег Стахаевіч кажа, што сітуацыя на гэтым горназдабыўным прадпрыемстве іншых начальнікаў нічому не навучыла:
«Тое, што мы на „Граніце“ ўзнялі шум з гэтым „бязмежжам“, з гэтымі нечалавечымі адносінамі адміністрацыі да працаўнікоў, мы гэта назіраем, у прынцыпе, па ўсіх прадпрыемствах у Беларусі. І пратэст рабочых „Граніту“, атрымліваецца, ніяк не паўплываў на адміністрацыю суседніх прадпрыемстваў».
У такім выпадку, кажа спадар Стахаевіч, незалежныя прафсаюзы — адзіная дапамога для рабочых, якія церпяць уціск.
Музыка Цім Суладзэ: Розніца 30 гадоў — тое, што адпавядае маім уяўленням пра адносіны41
Каментары