Тэрмін расследавання па справе былога намесніка міністра ўнутраных спраў Беларусі — начальніка міліцыі грамадскай бяспекі Яўгена Полудня прадоўжаны да 8 кастрычніка. Пра гэта БелаПАН паведамілі ў Следчым камітэце.
Мера стрымання ў дачыненні да Полудня засталася ранейшай — утрыманне пад вартай.
Намеснік міністра ўнутраных спраў — начальнік міліцыі грамадскай бяспекі Яўген Полудзень быў затрыманы 8 снежня 2011 года. Праз тыдзень яму было прад’яўлена абвінавачанне паводле часткі 3 артыкула 424 КК (злоўжыванне ўладай ці службовымі паўнамоцтвамі). У лютым 2012 года ў дачыненні да Полудня была распачата другая крымінальная справа — па прыкметах злачынства, прадугледжанага часткай 3 артыкула 426 КК (перавышэнне ўлады ці службовых паўнамоцтваў асобай, якая займае адказную пасаду). Абедзве справы аб’яднаныя ў адну вытворчасць. Следства ўстанавіла, што Полудзень сістэматычна працяглы час атрымліваў ад службовых асоб органаў унутраных спраў матэрыяльныя каштоўнасці і грашовыя сродкі.
На сустрэчы з журналістамі 27 красавіка начальнік Следчага камітэта Валерый Вакульчык паведаміў, што справа, якая расследуецца, — шматэпізодная, па ёй праходзіць шмат сведак. «Абгрунтаванасць затрымання Полудня не выклікае сумненняў», — сказаў кіраўнік СК.
