27 лістапада аднаму з найлепшых гітарыстаў свету споўнілася б 70.
27 лістапада 1942 года нарадзіўся Джымі Хэндрыкс — адзін з важнейшых гітарыстаў у гісторыі музыкі, чыя манера іграць на гітары змяніла аблічча тагачаснага рока.
Пачынаў Джымі Хэндрыкс гітарыстам у іншай легенды — Літл Рычарда, які дагэтуль трымае крыўду на музыку: маўляў, гэта я адкрыў Хэндрыкса свету, а ён пра мяне ніколі не ўзгадвае. Прэзентаваўшы Хэндрыкса свету, Літл Рычард пагнаў яго з гурту — надта ўжо прыцягваў увагу гледачоў.
Сапраўдная слава прыйшла да Хэндрыкса ў Брытаніі, дзе ягоныя гітарныя эксперыменты зрабіліся сапраўднай сенсацыяй: ніхто з англічан не бачыў, каб на гітары гралі так, і гэта пры тым, што ў той час галоўным гітарыстам Брытаніі быў Эрык Клэптан.
Лепей за ўсё адлюстроўваюць творчасць Хэндрыкса прыжыццёвыя альбомы — за час, які прайшоў пасля смерці Хэндрыкса, ягоных «новых альбомаў», склееных з кавалкаў студыйных сесій, разагнаных, запаволеных, скамячаных, выйшла з тузін. Апошні — у мінулым годзе. Колькасць канцэртнікаў таксама зашкальвае.
Аднак стварыць той новы музычны сусвет, пра які апошні год свайго жыцця ўвесь час казаў Хэндрыкс, так і не атрымалася. Тым не менш, першыя альбомы Are You Experienced?, Axis: Bold as Love і Electric Ladyland гэта сапраўдныя шэдэўры на ўсе часы.
Памёр Хэндрыкс у 27 год, стаўшы «чальцом клуба 27» — менавіта ў гэтым узросце памерлі некалькі значных музыкаў: бацька блюза Роберт Джонсан, гітарыст The Rolling Stones Браян Джонс, Джаніс Джоплін, Джым Морысан, Курт Кабэйн і Эмі Уайнхаўз. У адным са сваіх інтэрв’ю Хэндрыкс сказаў «калі я памру, проста працягвайце слухаць мае кружэлкі».
Цяпер чытаюць
Раптоўна памёр Уладзімір Усер — немалады актывіст, які ўляпаўся ў фільм БТ і шпіянаж у Польшчы27
Каментары