(Розныя выканаўцы), 2002
Існуе думка, што такога кшталту «прысьвячэньні» — хаўтуры па аўтару арыгіналаў. Стваральнікі трыб’ютаў нібыта падводзяць выніковую рысу пад усёй ягонай творчасьцю, тым самым кажучы: лепей ужо ня будзе. «Пахаваць» улюбёны гурт можна й іншым спосабам: празь недарэчную інтэрпрэтацыю арыгінальных твораў. Такія няўдалыя кавэры атрымаліся ў Людмілы Краўцовай (песьня «See You»), у гурту «Імпэт» («In Your Room»). Шчырапапсовая аранжыроўка Краўцовай выпадае з агульнага альтэрнатыўнага настрою, а вэрсія «Імпэту» слухаецца як чарнавы накід, не разьвітая як сьлед ні музычна, ні вакальна.
Астатнія творы — на ўзроўні. Стваральнікі трыб’юту быццам далі прастору слухачам: выбірайце свой гіт! Прыхільнікам аўтэнтыкі спадабаюцца адаптаваныя пад беларускую музычную традыцыю інтэрпрэтацыі «Троіцы» і «Крыві», аматарам гітарнай музыкі — Памідораў з «Гаерам» ды «Флэт», фанатам джазу — «Яблычная гарбата», гардкору — «Гарацкія»... Дарэчы, Піт Паўлаў — лідэр «Гарацкіх» — ажно «тройчы ўдзельнік» трыб’юту: граў на гітары яшчэ ў «NRM» і ў «Крыві». Голас Лявона Вольскага можна пачуць двойчы — у «Zet» і, вядома ж, у «NRM».
Жорсткія крытэры да мовы не прад’яўляліся. Траціна песень прасьпяваная па-беларуску, столькі ж на ангельскай, астатнія — інструмэнталы («Троіца», «Яблычная гарбата») і расейскамоўныя («Калі Юга», «Ляпіс»). Цікава прыдумаў Шадзько: куплет па-расейску, прыпеў — па-ангельску.
Увогуле ж рэклямны слоган праекту «Спадабалася «дэпэшам», спадабаецца і вам!» можна назваць слушным і нават разьвіць: «Нам падабаюцца ня «дэпэшы», а нашы!»
Калі ж «нашы дэпэшы»падабаюцца вам настолькі, што вы гатовыя выкласьці за гэты дыск любыя грошы, — чакайце выхаду калекцыйнага выданьня з тэкстамі песень, здымкамі й іншымі сюрпрызамі.
3 найлепшых кавэраў альбому: «Zet» — «Марны», «Крыві» — «Бяз гучных словаў», «NRM» — «Твой Езус».
Цяпер чытаюць
Няўдалае тэхнічнае рашэнне дорага абышлося арганізатарам галасавання ў Каардынацыйную раду1
Каментары