Павал Кржываглавы быў у пасольстве «гаспадаром». Па-чэску гэта значыць офіс-мэнэджэрам. Тэрмін ягонага перабываньня ў Менску скончыўся паўгоду таму, але ягоную місію працягнулі яшчэ на год.У мінулую сераду чэскага дыплямата затрымалі ў адной з кавярняў, нібы за расьпіцьцём гарачыцельных напояў зь менскім школьнікам. У пятніцу БТ, а за ім і іншыя каналы паказалі сюжэт, у якім пан Кржываглавы п’е піва і цалуецца з зусім маладымі людзьмі. Дыплямата абвесьцілі пэрсонай нон грата і выдварылі з краіны. Ён выехаў празь Берасьце на ўласнай машыне ў накірунку Чэхіі.
Усе тры чэскія агульнадзяржаўныя каналы — грамадзкая Чэская тэлевізія і прыватныя «Nova» ды «Prima» — адразу зацікавіліся рэпартажам і прапанавалі БТ набыць яго. Атрымала рэпартаж жаўтаватая «Nova» — і была расчараваная: схаваная камэра, адказы невядомых асобаў на допыце былі блытаныя й неканкрэтныя.
Абурыла чэхаў тое, што БТ не закрывае твараў непаўналетніх хлопцаў, якіх само ж называе «ахвярамі дыплямата-распусьніка». У Чэхіі гэтак ня робіцца.
Чэская прэса падкрэсьлівае, што ў цывілізаваным сьвеце падобныя канфлікты вырашаюцца па дыпляматычных каналах, без прапагандысцкіх рэпартажаў у тэлевізіі. Паскуднікі трапляюцца ва ўсіх краінах, іх нідзе ня церпяць. Справу Кржываглавага будзе расьсьледаваць і чэская паліцыя.
У чэхаў ёсьць пэўная алергія на падобную тэлепрапаганду. У 1970 —1980-я гады за камуністамі «фільмы» такога кшталту круціла тэлевізія — каб паказаць у найгоршым сьвятле апанэнтаў рэжыму.
Таму, акрамя нездаровай цікавасьці да пікантных падрабязнасьцяў у адных, абурэньня ў другіх і сьмеху ў трэціх, «кіно» дало падставу чэскаму МЗС сьцьвярджаць, што «інфармацыя, якую беларускае замежнапалітычнае ведамства прыводзіць як довад дэпартацыі, ня вартая даверу».
Поўны варыянт чытайце ў папяровай і pdf-вэрсіі газэты "Наша Ніва"
Прага
Цяпер чытаюць
Міністр сувязі: Абмежаванні мабільнага інтэрнэту закрануць 1,7 мільёна беларусаў15
Каментары