У Докшыцах памерла 45-гадовая медсястра, маці траіх дзяцей: пахаваюць у закрытай труне
21 красавіка ў Докшыцкай бальніцы памерла 45-гадовая медсястра Аксана Радкевіч, маці трох дзяцей.
Яна працавала ў дзіцячым аддзяленні ў працэдурным кабінеце.
Па словах знаёмых сям’і, прычына смерці — пнеўманія.
«Яна доўга знаходзілася на апараце ШВЛ. Да гэтага некалькі дзён лячылася дома. Учора ўвечары памерла. Ведаю, што пахаванне будзе ў закрытай труне», — распавяла «Нашай Ніве» сяброўка Аксаны.
«Аксана жыла адна, дзеці ў іншым горадзе. Яны прыехалі ўжо пасля таго, як яе паклалі ў рэанімацыю, і самі праводзілі дэзынфекцыю кватэры.
Пахаваюць Аксану ў закрытай труне, нават у кватэру не будуць уносіць: забаранілі. Толькі каля пад'езда пару хвілін [дазволілі] развітацца і пасля развітацца на могілках», — расказваюць людзі.
Чытайце таксама: «І хто сядзеў каля яе, зляглі з пнеўманіямі». Докшыцы спрабуюць зразумець, як занёсся вірус
«Наша Ніва» звязалася з былым мужам жанчыны Міхаілам. Пра каранавірус ён не ведае.
«Нам сказалі проста — памерла ад пнеўманіі. Ці рабілі той аналіз, я не ў курсе. Але хаваць будуць у закрытай труне, гэта праўда», — паведаміў Міхаіл.
Усяго нам вядомы імёны і прозвішчы мінімум 13 памерлых ад «пнеўманій» у Докшыцкім раёне, але гэтыя звесткі могуць быць няпоўныя. Афіцыйная статыстыка не публікавалася.
Каментары