Гран-пры «Belarus Press Photo 2011» атрымаў фотакар «Нашай Нівы» Сяргей Гудзілін 20

У чорную-чорную пятніцу 13 мая ў Менску прайшла цырымонія ўзнагароджвання пераможцаў конкурсу прафесійных фотарэпарцёраў Беларусі «Belarus Press Photo 2011».

Фота, якое атрымала Гран-пры.

Сяргей Гудзілін за працай.

Конкурс праводзіцца ўсяго ў другі раз, але ўжо сёлета пераможцы мусілі атрымоўваць свае ўзнагароды ў паўпадпольных умовах. Спадзяванні арганізатараў зладзіць урачыстую цырымонію ў Музеі гісторыі і культуры Менску разбіліся аб цвердалобасць адміністрацыі гэтай установы. Азнаёміўшыся з працамі пераможцаў «BPP 2011», прадстаўнікі музея заявілі арганізатарам, што іх цырымонія і выстава ў музеі адбыцца не можа праз «нізкую эстэтычную вартасць фатаграфій». Тое, што здымкі адбіралі аўтарытэтныя эксперты з суседніх з Беларуссю краін, для музейшчыкаў не мела значэння. Хаця, магчыма, прычына зусім у іншым. Сярод прац-пераможцаў ёсць некалькі фота з Плошчы, а таксама (крый, Божа!) партрэт Уладзіміра Някляева, судовы працэс над якім яшчэ не завяршыўся.

Але «Гасподзь з імі…», як заявіў вядоўца цырымоніі узнагароджвання Аляксандр Памідораў пра адміністрацыю Музея гісторыі і культуры Менска.

Свае ўзнагароды пераможцы «BPP 2011» атрымоўвалі ў памяшканні фотастудыі «Знята». Атрымалася ўтульна і прыемна, хоць у невялікай залі камеры не было дзе ўпасці праз неверагодную шчыльнасць фатографаў і іх прыхільнікаў.

Слова перад прысутнымі ўзяў адзін з арганізатараў конкурсу, Сяргей Міхаленка: «Хачу ўсіх павіншаваць з тым, што конкурс адбыўся. Другі раз нам было лягчэй, але складанасці па-ранейшаму існуюць. Робячы гэты конкурс, мы спазнаем людзей, а гэта самае галоўнае». Арганізатары не разменьваліся на фармальнасці і аддалі мікрафон у валоданне вядоўцу Аляксандру Памідораву. Памідораў за справу агучвання спісу пераможцаў узяўся спрытна і даў рады васьмі намінацыям за паўгадзіны. Ільвіную частку ўзнагародаў атрымалі добра знаёмыя беларускім фатографам і журналістам Андрэй Лянкевіч, Віктар Драчоў і Наталля Аблажэй. А вось з Гран-пры атрымаўся сапраўдны сюрпрыз.

Canon EOS 7D, які адыграў ролю галоўнага прыза «Belarus Press Photo 2011», паедзе ў Жодзіна разам з Сяргеем Гудзіліным.

Малады фатограф атрымаў Гран-пры за фота, зробленае падчас службы ў войску. Мяркуючы па рэакцыі, узнагарода стала для яго вялікай нечаканасцю. «Дэмбель непазбежны!» — толькі і змог выціснуць з сябе Сяргей, пазуючы з узнагародай перад фотакамерамі. Яно вядома — фатографу роля мадэлі не зусім звычная.

Пераможная серыя фотаў Сяргея Гудзіліна.

Сяргей Гудзілін нарадзіўся ў 1987-м у Жодзіне. Як фатограф і як рэпарцёр самавук. Ягоным універсітэтам быў Малады Фронт.

* * *

Далей было шампанскае і шмат радасці, якую ў гэты вечар для арганізатараў не сапсавала нават тое, што сціплая праз адсутнасць памяшкання выстава будзе вісець на сценах фотастудыі «Знята» толькі адзін вечар. Фатографы абяцаюць не здавацца.

* * *

Спіс пераможцаў па намінацыях:

Мастацтва і забавы

Адзіночныя фота

3 Н.Аблажэй

2 А.Жукава

1 В.Цуранаў

Серыі

3 В.Байкоўскі

2 А.Сталярова

1 С.Грыц

Прырода

Адзіночныя фота

3 А.Мацюшкоў

2 А.Васюковіч

1 Н.Аблажэй

Серыі

3 В.Драчоў

2 А.Лянкевіч

1 А.Лянкевіч

Спорт

Адзіночныя фота

3 В.Драчоў

2 В.Байкоўскі

1 У.Мікалайчык

Серыі

1 А.Сталяроў

Паўсядзённае жыццё

Адзіночныя фота

3 В.Драчоў

2 В.Байкоўскі

1 С.Гудзілін

Серыі

3 А.Міхалковіч

2 А.Бібікаў

1 В.Цуранаў

Народныя традыцыі

Адзіночныя фота

3 У.Мікалайчык

2 А.Васюковіч

1 Н.Аблажэй

Серыі

3 Т.Зеньковіч

2 Н.Дораш

1 А.Лянкевіч

Партрэт

Адзіночныя фота

3 А.Лянкевіч

2 А.Рубчэня

1 Д.Кляпіцкі

Серыі

2 А.Лянкевіч

1 С.Гудзілін

Людзі ў навінах

Адзіночныя фота

3 Т.Зянковіч

2 Г.Мажэйка

1 В.Драчоў

Серыі

3 В.Драчоў / У.Грыдзін

2 А.Лянкевіч

1 А.Васюковіч

Навіны

Адзіночныя фота

3 В.Фядосенка

2 С.Гапон

1 В.Фядосенка

Серыі

3 А.Мацюшкоў

2 С.Грыц

1 Н.Аблажэй

Намінацыя «Вяртанне»

Н.Дораш за праект аб Гродна «Дом 13»

Гран-пры

Сяргей Гудзілін

Арганізатарамі конкурсу сёлета выступілі:

Вадзім Заміроўскі, Юлія Дарашкевіч, Сяргей Міхаленка

Алесь Пілецкі

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ