Помнік Францыску Скарыну ў Калінінградзе цяпер будзе стаяць на тэрыторыі гуманітарных карпусоў Балтыйскага федэральнага ўніверсітэта імя Імануіла Канта. Урачыстае адкрыццё помніка на новым месцы адбылося ў рамках II форуму «Расія і Беларусь: агульная гісторыя, агульны лёс», які гэтымі днямі праходзіць у Калінінградзе, паведаміла пасольства Беларусі ў Расіі.
Скульптура вышынёй 3,5 метра і вагой 2 тоны выкананая з бронзы і была адлітая ў майстэрні ў Смалявічах. Яе аўтар — прафесар Беларускай акадэміі мастацтваў Анатоль Арцімовіч.
У 2004 годзе скульптуру Калінінградскай вобласці падарыла Калінінградскае зямляцтва беларусаў. Тады было вырашана паставіць помнік на пляцоўцы перад адміністрацыйным корпусам БФУ на вуліцы Аляксандра Неўскага ў Калінінградзе.
Падчас будаўніцтва новага кампуса БФУ адміністрацыя ўніверсітэта прыняла рашэнне аб пераносе помніка Скарыны да гістарычных карпусоў універсітэта, дзе навучаюцца студэнты гуманітарных спецыяльнасцяў.
Выступаючы на ўрачыстасці, былы дырэктар Інстытута гісторыі НАНБ і рэктар Акадэміі кіравання пры Лукашэнку, а цяпер дэпутат Палаты прадстаўнікоў Вячаслаў Даніловіч адзначыў, што «ў саюзнай дзяржаве мы захоўваем памяць пра людзей, якія ўнеслі велізарны ўклад у развіццё нашых народаў».
Цяпер чытаюць
Сустрэчу Рыжанкова з Сікорскім папрасіў Мінск. Што каманда Ціханоўскай абмяркоўвала з палякамі да і пасля яе12
Каментары