Pasła Kyrhyzstana ŭ Biełarusi pryznačać paśla ekstradycyi Bakijevych

Pasły Kyrhyzstana ŭ Biełarusi i Vialikabrytanii buduć pryznačanyja paśla taho, jak u hetych krainach vyrašać pytańni ab ekstradycyi na radzimu byłoha prezidenta Kurmanbieka Bakijeva, jaho małodšaha brata Žanyša, a taksama małodšaha syna eks-prezidenta Maksima Bakijeva. Pra heta paviedamlaje hazieta «Viečiernij Biškiek» sa spasyłkaj na krynicu ŭ dypłamatyčnych kołach Kyrhyzstana.

«Biełaruski bok pajšoŭ na pieramovy. My aptymistyčna hladzim na hety praces i budziem spadziavacca, što pryniatyja rašeńni ŭ dačynieńni da Bakijevych viernuć adnosiny dźviuch krain na raniejšy ŭzrovień i navat nadaduć im novy impuls», — cytuje surazmoŭcu vydańnie.

Nahadajem, pasoł Kyrhyzstana byŭ adklikany ź Minska ŭ žniŭni 2012 hoda. Heta adbyłosia paśla taho, jak u internet trapiŭ zdymak Žanybieka Bakijeva, brata eks-prezidenta Kurmanbieka Bakijeva, jaki byŭ sfatahrafavany ŭ centry Minska. Kirhizski bok zapatrabavaŭ ad Minska zatrymańnia i ekstradycyi Žanybieka Bakijeva, jaki znachodzicca ŭ mižnarodnym vyšuku pa abvinavačvańni ŭ asabliva ciažkich złačynstvach. Čakanaj reakcyi ź biełaruskaha boku nie było.

Pasoł Kyrhyzstana ŭ Vialikabrytanii byŭ adklikany vosieńniu pa toj ža pryčynie — z-za adsutnaści rašeńnia pa ekstradycyi Maksima Bakijeva.

Kurmanbiek Bakijeŭ ź nieaficyjnaj žonkaj i dvuma dziećmi pryjechaŭ u Biełaruś pa asabistym zaprašeńni Alaksandra Łukašenki 19 krasavika 2010 hoda paśla dziaržaŭnaha pieravarotu ŭ Kyrhyzstanie. Padčas pieravarotu zahinuli kala 90 čałaviek, prykładna tysiača atrymali ranieńni. Kurmanbiek Bakijeŭ, jaho brat Žanybiek, syn Marat i inšyja nabližanyja zavočna byli abvinavačanyja ŭ masavym zabojstvie, spałučanym ź pieravyšeńniem słužbovych paŭnamoctvaŭ, i abjaŭleny ŭ mižnarodny vyšuk. Novyja ŭłady Kyrhyzstana nieadnarazova źviartalisia ŭ Hienprakuraturu Biełarusi z prośbaj ab vydačy Bakijeva, ale atrymlivali admovu. Na dumku biełaruskaha boku, pravavych padstaŭ dla zadavalnieńnia prośby ab vydačy Bakijeva niama.

14 maja vice-premjer Kyrhyzstana Šamil Atachanaŭ zajaviŭ, što Biškiek praciahnie prymać namahańni pa ekstradycyi Kurmanbieka i Žanyša Bakijevych ź Biełarusi.

15 maja namieśnik ministra zamiežnych spraŭ Kyrhyzstana Askar Biešymaŭ paviedamiŭ žurnalistam, što praces ekstradycyi Bakijevych «maje pazityŭny ruch» i zaraz «iduć pieramovy».

• 0
• 0
• 0
• 0
• 0
• 0
• 0
• 0