Nasta Rahatko: Usich, chto suprać udziełu biełarusaŭ u iventach rasijan, ja čakaju ŭbačyć na kirmašach polskich, brytanskich, ispanskich

«Viedać svajo miesca i zajmać bolš miesca — heta dva roznyja padychody», — razvažaje Nasta.

«Vielmi časta padčas i paśla pracy ŭ Ofisie Cichanoŭskaj bačyła, jak razmovy viaducca pryncypova nie ŭ tym pakoi — to-bok u madalnaści «niechta inšy pavinien rabić voś tak».

U AAN siekjuryci kansił źbirajecca vypracoŭvać polisi biaśpieki rehijona ŭschodniaj Jeŭropy biez tych, chto jaje nie źbirajecca prytrymlivacca. Aktyvisckija kanfierencyi abmiarkoŭvajuć, jak pavodzić siabie tym, chto nie byŭ ich udzielnikam: sartavać śmiećcie, nie hvałcić žančyn, budavać dyjaspary.

Vynik — manifiesty napisany, ale ich nichto nie dystrybutuje, tamu što zychodnaja meta nie pryciahnuć prychilnikaŭ, a nadzieć biełaje palito.

Voś i pytańnie jak śviet pavinien usprymać biełarusaŭ — čaściej za ŭsio viadziecca «na kuchni» siarod svaich. Usie sychodziać ščaślivyja i sahretyja ŭłasnaj pravatoj, maŭlaŭ, rasijanie zaŭsiody pabłažliva staviacca da biełarusaŭ, heta pahroza našaj niezaležnaści.

Sto pracentaŭ, na dziaržaŭnym uzroŭni Rasija pavinna pakinuć Biełaruś u spakoi.

Ale z punktu hledžańnia bytavoj i kulturnaj pabłažlivaści — darahija, a vy kamunikavali z kimści akramia rasijan?

Da nas pabłažliva staviacca praktyčna ŭsie — astatnija nie viedajuć pra naša isnavańnie.

Litoŭcy aścierahajucca ź biełarusami, kab my nie daj boh nie paličyli siabie ŭ ich jak [u siabie] doma. Palaki prymajuć biełarusaŭ, z uśmieškaj apalačvajučy, jany byli impieryjaj — u ich jość vopyt. Amierykancy adkryta kažuć, što Biełaruś dla ich — kluč da razmovy z Rasijaj i što ich uzbudžaje kalij, a nie naša samaść ci biada.

Ja zdahadvajusia, što pryjemniej dumać, nibyta Biełaruś nastolki viadomaja i ahientnaja, što jaje lubić umoŭny Zachad, a Uschod — nie. Ale heta spraščeńnie — nie analiz situacyi, a wishful thinking dla źnižeńnia tryvožnaści.

Voś byŭ kirmaš knih. Na im Nataša Radzina na svajoj prezientacyi tłumačyła rasijanam historyju VKŁ jak klučavoha etapu dla identyčnaści biełarusaŭ.

A potym Illa Jašyn napaiŭ mianie kavaj i na pytańnie, navošta jon robić partyju, skazaŭ: «Nu, Naścia, našy apazicyjnyja tusoŭki ŭsie zakrytyja, ja chaču heta źmianić. I liču, što my pavinny zajmać u jeŭrapiejskich sistemach usie dastupnyja nam miescy i hałasy».

Niejak u adkazach na pytańni ŭ storyz ja napisała: kab navučycca zajmać šmat miesca, treba praktykavacca zajmać šmat miesca. Potym na prezientacyi dziaŭčyna paprasiła padpisać joj knihu hetaj ža frazaj.

Tak, biaśpiečniej abmiarkoŭvać biełaruskaść siarod svaich, bo tady nichto nie tuzanie za rukaŭ i nie spytaje kryŭdnaje «a vy naohuł chto?» ci «Biełaruś? Dzie heta?».

Ale ŭtulny babł zhodnych — heta žadańnie być palublenym biez ryzyki stać uraźlivym. Realizavacca tvorča biez emacyjnaha ahaleńnia. Kubiki na presie, ni razu nie ŭspacieŭšy.

Pamiatajecie, zdajecca, ukrainski biznesmien Čarniak skazaŭ: «Na vas usim nasrać, a vy jašče i ścipłyja». Dyk heta nie ścipłaść, a narcysizm — siadzieć tolki ŭ svajoj bočcy i čakać, pakul inšyja ciabie pačnuć pavažać, aceniać i pryznajuć roŭnym.

Tamu ŭsim, chto piša, dzie biełarusam być možna i nielha:

Vy staicie na plačach u inšych biełarusaŭ, jakija hatovyja byli za siabie i za vas zajści ŭ luboje tavarystva, pahladzieć u vočy čałavieku, jaki kaža «nienavidžu ciabie», hetak ža prama — jak tamu, chto kaža «you are doing an incredible job».

U tych, chto hatovy nie abahulniać usich hramadzian krainy pad markaj adnaho ludajeda, tamu što ciabie samoha dakładna hetak ža abahulniali šmat razoŭ. Chto šukaje partnioraŭ, a nie vorahaŭ.

Biełaruś stanovicca hučniejšaj dziakujučy namahańniam mienavita hetych ludziej. Chto damohsia, kab byŭ biełaruski paviljon na Vieniecyjanskim bijenale. Chto advakatuje spraščeńnie lehalizacyj dla biełarusaŭ. Chto, jak vydaviectva «Mianie niama», apranaje haściej kirmašu ŭ svoj mierč na biełaruskaj movie.

A ŭsich, chto suprać udziełu biełarusaŭ u iventach rasijan, ja čakaju ŭbačyć na kirmašach polskich, brytanskich, ispanskich. Ź litaraturaj, kino, vystavami, jakija my z vami stvaryli ci adaptavali na hetyja movy.

Voś tady hetaja razmova piarojdzie z madalnaści:

— biełarusy pavinny viedać svajo miesca

jak byccam zamiežniki — ci my sami pamiž saboj — možam kamuści dazvalać ci zabaraniać štości, niby pakajovym źviarkam.

U madalnaść:

— biełarusy mohuć zajmać bolš miesca

tamu što dla hetaha nie patrebna ničyjo błasłavieńnie, tamu što pra takoje nie pytajucca, a robiać».

• 8
• 5
• 0
• 11
• 0
• 0
• 2
• 0