Śpiecsłužby raskryli akaličnaści spravy Hajdukova

Pa słovach supracoŭnikaŭ KDB i prakuratury, u žniŭni 2012 hoda KDB atrymaŭ apieratyŭnuju infarmacyju, što 23-hadovy rabočy zavoda «Naftan» Andrej Hajdukoŭ napisaŭ u CRU list, u jakim na anhlijskaj i rasiejskaj movach prapanavaŭ svaje pasłuhi. Pry hetym Hajdukoŭ dasłaŭ list nie zvyčajnaj poštaj, a pieradaŭ jaho svajmu siabru, kab toj adpraviŭ kanviert z terytoryi inšaj dziaržavy. Paviedamlajecca, što toj list śpiecsłužby «pierachapili pry nadhladzie ŭ aeraporcie», bo, maŭlaŭ, užo «raniej dziejańni siabroŭ vyklikali padazreńni».

Nasamreč, havorka, najchutčej, moža iści ad infarmataru KDB, jaki paviedamiŭ ab namiery Hajdukova — kimści ź liku blizkich da jaho asobaŭ.

Pa słovach pieršaha namieśnika prakurora Viciebskaj vobłaści Alaksandra Sidaroviča, Hajdukoŭ prapanoŭvaŭ zamiežnaj śpiecsłužbie try varyjanty šyfravanaj suviazi z saboj u vyhladzie ramantyčnych pasłańniaŭ.

Paśla hetaha, piša «Komsomolskaja pravda v Biełarusi», KDB pad vyhladam CRU try miesiacy vioŭ ź niedarosłym Džejmsam Bondam apieratyŭnuju hulniu, kožny krok fiksujučy na fota, videa i aŭdyjo. Pieršuju sustreču Hajdukovu pryznačyli pad Hrodnam.

U chodzie hetaj hulni apierataru zavoda «Naftan» ad imia CRU prapanavali vykanać pieršaje kankretnaje zadańnie — pranieści da siabie na pracu i ŭstalavać špijonskuju prahramu dla pieradačy źviestak. Kali stała zrazumieła, što čałaviek dziejničaje śviadoma i pa ŭłasnaj inicyjatyvie, i što za im bolš nichto nie staić, było vyrašana pravieści zatrymańnie. Na Hajdukova nadzieli kajdanki, kali jon zabraŭ z nazvanaha jamu tajnika hrošy za svaju pracu. Havorka idzie pra 300 dalaraŭ. Tajnik ahienty KDB zakłali zrabili ŭ adnoj z tratuarnych plitačak kala amfiteatra ŭ Viciebsku.

U Navapołacku Hajdukoŭ ź nievialikaj hrupaj siabroŭ naležaŭ da supołki «Sajuz intelektuałaŭ». Naziralniki adznačali, što sama hetaja arhanizacyja, jakaja nie viała nijakaj realnaj dziejnaści, vyhladaje jak psieŭdastruktura, stvoranaja śpiecsłužbami dla zboru infarmacyi pra apazicyju.

Prakurory i śledčyja ličać, što Hajdukoŭ byŭ upeŭnieny, što jon sapraŭdy pracavaŭ z CRU i navat bajaŭsia pomsty ź ich boku za svoj ahienturny pravał. I tolki ŭ turmie zrazumieŭ, što jaho raźviali.

Pakolki nijakaj realnaj infarmacyi Hajdukoŭ nie pieradaŭ, to sud pierakvalifikavaŭ spravu sa špijanažu va «ŭstanaŭleńnie supracoŭnictva z zamiežnaj dziaržavaj biez prykmietaŭ zdrady radzimie». Hajdukovu dali paŭtara hoda turmy, adnak z ulikam taho, što 8 miesiacaŭ jon užo adsiedzieŭ, jon nieŭzabavie moža vyjści na svabodu ŭmoŭna-daterminova.

Pasolstva ZŠA ŭ Minsku raniej admoviłasia niejak kamientavać infarmacyju pra spravu Hajdukova.

Sud nad Hajdukovym byŭ zakryty. Musić, śpiecsłužby nie chacieli zaśviečvać imia čałavieka, jaki raskazaŭ im pra «namiery» Hajdukova. Sychodziačy z zakrytaści suda, pravaabaroncy byli schilnyja pryznać asudžanaha palitviaźniem, na asnovie taho što Hajdukoŭ udzielničaŭ u apazicyjnaj dziejnaści. Mahčyma, novaapublikavanaja infarmacyja źmienić ich padychod da hetaj spravy.

• 0
• 0
• 0
• 0
• 0
• 0
• 0
• 0