Zatrymany 14 vieraśnia ŭ Minsku Andrej Bandarenka, kiraŭnik pravaabarončaj ustanovy «Płatform inaviejšn», pozna viečaram byŭ adpuščany z Maskoŭskaha RUUS, paviedamlaje BiełaPAN.
Pryblizna apoŭnačy na jaho staroncy ŭ Facebook źjaviŭsia zapis: «Vymušany manitorynh Maskoŭskaha RUUS nie vyliŭsia ŭ manitorynh CIP (Centr izalacyi pravaparušalnikaŭ. — BiełaPAN.).
Praŭda, los jašče troch čałaviek pakul nieviadomy, spadziajemsia, što jany ŭ chutkim časie buduć adpuščanyja. Dziakuj usim, chto padtrymlivaŭ mianie i ŭdzielnikaŭ akcyi». Zaraz telefon Bandarenki nie adkazvaje.
Jak raniej paviedamlaŭ BiełaPAN, 14 vieraśnia, u Dzień horada, u centry Minska była zatrymana hrupa ŭdzielnikaŭ akcyi pamiaci 21-hadovaha minčanina Ihara Pcičkina, jaki raptam pamior krychu bolš za 40 dzion tamu ŭ śledčym izalatary № 1 na vulicy Vaładarskaha.
Pavodle aficyjnaj viersii, pryčynaj śmierci staŭ sardečny prystup. Adnak svajaki i siabry Pcičkina miarkujuć, što jon pamior paśla žorstkich źbivańniaŭ u SIZA. Na sajcie «Płatform inaviejšn» (www.platformarb.com) byli raźmieščany paśmiarotnyja fatahrafii Pcičkina, na jakich bačnyja vialikija hiematomy na pieradpleččach, zapiaściach, kiściach, u vobłaści rebraŭ, a taksama paškodžańni nižej za kalena. U Śledčym kamitecie svajakam Ihara paviedamili, što pa fakcie jaho śmierci pravodzicca pravierka.
14 vieraśnia svajaki i siabry Pcičkina mieli namier pravieści chvilinu maŭčańnia kala ścien SIZA na Vaładarskaha — pakłaści kvietki i zapalić śviečki. Piaciora ŭdzielnikaŭ akcyi, u tym liku ciažarnaja siastra zahinułaha Iryna Miranovič, byli zatrymany i dastaŭleny ŭ Centralnaje RUUS.
Tudy ž byli dastaŭleny karespandenty «Radyjo Svaboda» Aleh Hruździłovič i haziety «Naša niva» Iryna Arachoŭskaja i Hanna Badziaka, jakija aśviatlali akcyju. Praz try hadziny žurnalistaŭ adpuścili pry sadziejničańni pres-sakratara HUUS Minharvykankama Alaksandra Łastoŭskaha, jaki pryjechaŭ u RUUS.
U dačynieńni da astatnich praviedzieny administracyjnyja pracedury, ich čakajuć sudy pa administracyjnych spravach. Pozva, jakaja pradpisvaje źjavicca 16 vieraśnia ŭ sud Centralnaha rajona, uručana taksama Irynie Miranovič. Ciažarnaja žančyna adpuščana z RUUS.
Ci zdaść Tramp Ukrainu Rasii? Čamu demakraty razhromlenyja? Da čaho pryviadzie kantrol respublikancaŭ nad vykanaŭčaj i zakanadaŭčaj uładaj adnačasova?8181
Kamientary