Biełaruskija turfirmy hatovy zapłacić za milicejskaje supravadžeńnie turystaŭ va Ukrainie, kab nie stracić klijentaŭ
Biełaruskija turystyčnyja kampanii razhladajuć mahčymaść arhanizacyi achoŭnaha supravadžeńnia aŭtobusaŭ padčas pajezdak na terytoryi Ukrainy.
Jak paviedamiła na pres-kanfierencyi ŭ Minsku 11 krasavika hienieralny dyrektar turkampanii Solvex Aksana Bičun, biełaruskija turysty admaŭlajucca ad aŭtobusnych turaŭ u Bałharyju, kali maršrut prachodzić pa terytoryi Ukrainy, a nie Polščy.
Asablivuju tryvohu dyrektar turfirmy vykazała nakont raźvićcia situacyi va Ukrainie paśla prezidenckich vybaraŭ, pryznačanych na 25 maja.
«Siezon pačynajecca ŭ červieni, tamu ŭsie našy dziejańni, jakija buduć źviazany z raźvićciom biaśpieki ŭ krainie, mohuć być raźviejany ŭščent. My siońnia nie ŭpeŭnieny ŭ tym, što budzie ŭ krainie paśla vybaraŭ», — adznačyła jana.
Na dumku Bičun, kali Ukraina nie ažyćciavić nijakich dziejańniaŭ, to moža stracić biełaruski rynak.
«My hatovy siońnia zapłacić za milicejskaje supravadžeńnie, kab na miažy našy aŭtobusy sustrakali i supravadžali. Vy možacie harantavać nam biaśpieku takim čynam», — prapanavała jana pradstaŭnikam ukrainskaha pasolstva ŭ Biełarusi.
«My vybudavali svaje hrafiki, ale my nie viedajem, što budzie paśla vybaraŭ. My zaniepakojeny i siońnia dadatkova akredytujemsia ŭ jeŭrapiejskich pasolstvach, atrymlivajem dadatkovyja tranzitnyja vizy, tamu što rychtujemsia da samaha horšaha — što my praz Ukrainu nie pajedziem», — adznačyła Bičun.
Jak raskazała dyrektar turystyčnaj firmy «Kaŭ-Tur» Ała Kłokava, pradstaŭniki adnoj z haścinic Čarnaŭcoŭ vykazali hatoŭnaść zabiaśpiečyć płatnyja pasłuhi pa achoŭnym supravadžeńni biełaruskich turystyčnych aŭtobusaŭ, kali jany buduć jechać centralizavanaj kałonaj.
Akramia taho, pavodle słoŭ pradstaŭnika ŭkrainskaha sanatorna-kurortnaha kompleksu «Truskaviec» Aleha Rehi, va Ukrainie pracuje dziaržaŭnaja słužba achovy, jakaja lehalna pradastaŭlaje pasłuhi pa ŭzbrojenaj achovie transpartu.
Kamientary