Z 1 lipienia moža być uviedzienaja dziaržaŭnaja manapolija na impart

U Biełarusi mohuć być likvidavanyja ŭsie aŭtamabilnyja dylery. Taki ž los moža napatkać usich astatnich imparcioraŭ, jakija navat addalena kankurujuć ź biełaruskimi vytvorcami.

Nahadajem, što Saviet ministraŭ raspracavaŭ prajekt ukaza, zhodna ź jakim u Biełarusi z 1 lipienia na paŭhoda ŭvodzicca vyklučnaje prava dziaržavy na impart u Biełaruś tavaraŭ, anałahi jakich vyrablajucca ŭ Respublicy Biełaruś. Ažyćciaŭlać vyklučnaje prava dziaržavy stvaralniki dakumienta prapanujuć dvanaccaci pramysłovym pradpryjemstvam. Siarod vyklučnych imparcioraŭ AAT «MAZ», AAT «MTZ», AAT «Biełšyna», AAT «Haryzont», ZAT «Atłant», AAT «Homsielmaš» i inšyja viadomyja kampanii.

U jakaści metaŭ pryniaćcia ŭkaza prapisany dźvie mety, jakija ŭ ciapierašniaj ekanamičnaj situacyi faktyčna vyklučajuć adna adnu. Heta «zadavalnieńnie patrebaŭ na ŭnutranym rynku Biełarusi niekatorymi impartnym tavarami ŭ šyrokim asartymiencie» i «abarona ekanamičnych intaresaŭ dziaržavy». Zrazumieła, što ŭ Biełarusi niama prablemy z adsutnaściu na palicach impartnych tavaraŭ. Jakraz naadvarot — ekspart padaje. Zhodna z analityčnym ahladam Nacbanka prysutničaje admoŭnaja dynamika ekspartu niekatorych klučavych ekspartnych tavaraŭ, u tym liku šyn (u 1,7 razy), čornych mietałaŭ (na 6,6%), siedłavych ciahačoŭ (u 1,9 razy), sielskahaspadarčych mašyn i miechanizmaŭ ( na 35,9%), zapčastak dla aŭtamabilaŭ i traktaroŭ (na 22,6%).

Tamu nie vyklikaje sumnieŭ, što składalniki dakumienta chitrujuć i sapraŭdnaja meta dakumienta — faktyčna źvieści da nula impart tavaraŭ, anałahi jakich vyrablajucca ŭ Biełarusi. Voś tolki mietady vybrany dziŭnyja.

Prajekt ukaza nastolki adarvany ad realnaha žyćcia krainy i ad abjektyŭnych ekanamičnych zakonaŭ, što mimavoli zadaješsia pytańniem: moža, jaho stvaralniki žyvuć u inšaj Biełarusi?

Tak, miarkujecca, što vyklučnym imparcioram usich aŭtamabilaŭ u Biełaruś stanie AAT «MAZ». Pryčym havorka idzie nie tolki ab hruzavych aŭtamabilach, ale i ŭsich lehkavych, u tym liku z krain Mytnaha sajuza. Jakim čynam heta budzie realizavana praktyčna, zrazumieć składana.

AAT «MTZ» budzie adzinym imparcioram sielhastechniki i abstalavańnia. AAT «Haryzont» — radyjo-, tele-, videa- i bytavoj techniki.

AAT «Biełšyna» budzie adzinym pastaŭščykom u Biełaruś šyn i pakryšak. I hetak dalej pa ŭsich vidach pramysłovych tavaraŭ, jakija vyrablajucca ŭ Biełarusi. Tavary zamiežnych vytvorcaŭ buduć pryvozić u Biełaruś nie tyja, chto ŭmieje i choča heta rabić. Zamiežny tavar dazvolać pastaŭlać u Biełaruś ich biełaruskim kankurentam.

Padzialicca ŭražańniami ad prajekta ŭkaza «Ježiednievnik» paprasiŭ kiraŭnika Biełaruskaj aŭtamabilnaj asacyjacyi Siarhieja Michnieviča.

— Ci vialisia jakija-niebudź pieramovy z aŭtamabilnym dylerami pierad raspracoŭkaj ŭkaza?

— Na samaj spravie, hety prajekt ukaza trapiŭ da nas zusim vypadkova i z nami nie abmiarkoŭvaŭsia. My nie pryciahvalisia ni ŭ jakaści ekśpiertaŭ, ni ŭ jakaści analitykaŭ.

— Ci buduć padpadać pad dziejańnie prajekta ŭkaza pastaŭki z krain Mytnaha sajuza — Rasii i Kazachstana?

— Kali čytać litaralna heta prajekt, to jon raspaŭsiudžvajecca na luby impart, u tym liku z Rasii i Kazachstana. I choć płanujecca, što ŭkaz budzie dziejničać tolki šeść miesiacaŭ, ja nie dumaju, što Rasijskaja Fiederacyja dazvolić źjavicca ŭkazu. Jon budzie supiarečyć usim damoŭlenaściam nie tolki ŭ ramkach padpisanaha Ekanamičnaha sajuza, jaki pačnie dziejničać sa studzienia, ale i ŭsim dvuchbakovym damoŭlenaściam pamiž Biełaruśsiu i Rasijaj.

— U prajekt ukaza ŭvajšli lehkavyja aŭtamabili, vyklučnym imparcioram jakich stanie MAZ. Jak vy aceńvajecie heta novaŭviadzieńnie?

— Vy viedajecie, my naohuł sumniavajemsia, što hety ŭkaz budzie padpisany ŭ tym varyjancie, u jakim my jaho ŭbačyli. Heta nie zusim prapracavany dakumient, miakka kažučy. U vypadku jaho padpisańnia kraina sutykniecca z prablemami, jakija my bačyli ŭ 2011 hodzie: narod kiniecca skuplać valutu i pajedzie pa tavary ŭ Jeŭropu ci ŭ susiedniuju Rasiju. My ličym, što hety ŭkaz nie pavinien być padpisany pa łohicy i zdarovym sensie. My prapanujem Minppramu i Saŭminu razhledzieć inšyja varyjanty abarony rynku, u tym liku i aŭtamabilnaha.

— Što Biełaruskaja aŭtamabilnaja asacyjacyja maje namier zaraz raspačać?

— My napisali listy ŭ Saviet ministraŭ, u Administracyju Prezidenta Respubliki Biełaruś z našymi prapanovami. Dla taho, kab abaraniać svoj rynak my prapanujem inšyja miechanizmy, jakija b nasili ekanamičny charaktar, a nie zabaronny. Ekanamičnyja mietady mahli b stymulavać našych hramadzian kuplać tavary i aŭtamabili ŭ Biełarusi. A voś zabaronnyja miery ŭ adkrytaj z Rasijaj i Kazachstanam ekanomicy naŭrad ci hetamu dapamohuć.

My niefarmalna ŭžo hutaryli z čynoŭnikami, jakija mieli dačynieńnie da raspracoŭki hetaha ŭkaza. Uvohule ž, my znajšli razumieńnie ŭ tym, što dadzienamu ŭkazu nie pavinien davacca chod. Ja spadziajusia, što hety dakumient nie budzie padpisany.

• 0
• 0
• 0
• 0
• 0
• 0
• 0
• 0