Hurt «Stary Olsa» ŭkłaŭ «Hieraičny epas» i prezentuje jaho 16 krasavika.
Hurt «Stary Olsa» ŭkłaŭ «Hieraičny epas» i prezentuje jaho 16 krasavika.
Svoj vośmy dysk «Hieraičny epas» udzielniki hurtu «Stary Olsa» nazyvajuć pieršym albomam, zasnavanym na vyklučna aryhinalnym materyjale. «Kali raniej my dazvalali razhulacca fantazii ŭ niekatorych pieśniach, to na novym dysku sabranyja tolki aryhinalnyja staradaŭnija melodyi. I śpiavajucca tolki aryhinalnyja staraŭdaŭnija pieśni», – apaviadaje lider hurtu Źmicier Sasnoŭski. U «Hieraičny epas» uvajšli ŭračystyja tvory, vajskovyja pieśni, narodnyja balady, abjadnanyja hieraičnaj tematykaj. Tak, «Rycarstva ŭsio syšłosia» pryśviečana dyversijnaj vypravie vojska VKŁ u Maskoviju ŭ 1580 h., «Kleckaja bitva» na słovy Macieja Stryjkoŭskaha apaviadaje pra bitvu z tatarami ŭ 1506 h., jość śpieŭ pra Hrunvald, panehiryčnyja tvory pra vialikich kniazioŭ i słaŭnych rycaraŭ VKŁ.
Muzyki nadavali ŭvahu pracy z fanetykaj, vymaŭlajučy ŭsie słovy, jak toje mierkavałasia ŭ aryhinale. Dziela hetaha muzyki pracavali nad albomam razam z navukoŭcami – Stanisłavam Akinčycam, Alaksandram Hłuškom, Edvardam Zajkoŭskim. «My adkryli novy kirunak – muzyčnaje daśledavańnie, – kaža Z.Sasnoŭski. – Na dysku, akramia śpievaŭ, možna znajści padrabiaznyja histaryčnyja kamentary da kožnaha ź ich». Lider «Staroha Olsy» robić papraŭku na toje, što jany nablizilisia da aryhinału, «ale nichto dakładna nia moža skazać nakolki».
U «Hieraičnym epasie» navat dobra abaznanych słuchačoŭ čakaje niamała znachodak, jak to biełaruski varyjant duchoŭnaha himnu «Baharodzica» ci balada «Padymaliś čorny chmary», čas stvareńnia jakoj daśledčyki adnosiać da časoŭ tatarskich našeściaŭ.
Albom ź pieramožnymi pieśniami hurt prezentuje 16 krasavika ŭ Pałacy prafsajuzaŭ. Kab pieradać tahačasnuju muzyčnuju atmasferu, «Stary Olsa» zaprasiŭ dadatkovych muzykaŭ. Dla kožnaj pieśni padabranyja adpaviednyja pa časie instrumenty – dudy, žalejki, huśli, lutni, lira, bubny.
Siarhiej Budkin
Kancert adbudziecca 16 krasavika ŭ Pałacy prafsajuzaŭ. Pačatak u 19.00.
Kamientary