Гурт «Стары Ольса» ўклаў «Гераічны эпас» і прэзэнтуе яго 16 красавіка.
Гурт «Стары Ольса» ўклаў «Гераічны эпас» і прэзэнтуе яго 16 красавіка.
Свой восьмы дыск «Гераічны эпас» удзельнікі гурту «Стары Ольса» называюць першым альбомам, заснаваным на выключна арыгінальным матэрыяле. «Калі раней мы дазвалялі разгуляцца фантазіі ў некаторых песьнях, то на новым дыску сабраныя толькі арыгінальныя старадаўнія мэлёдыі. І сьпяваюцца толькі арыгінальныя стараўдаўнія песьні», – апавядае лідэр гурту Зьміцер Сасноўскі. У «Гераічны эпас» увайшлі ўрачыстыя творы, вайсковыя песьні, народныя баляды, аб’яднаныя гераічнай тэматыкай. Так, «Рыцарства ўсё сышлося» прысьвечана дывэрсійнай выправе войска ВКЛ у Масковію ў 1580 г., «Клецкая бітва» на словы Мацея Стрыйкоўскага апавядае пра бітву з татарамі ў 1506 г., ёсьць сьпеў пра Грунвальд, панэгірычныя творы пра вялікіх князёў і слаўных рыцараў ВКЛ.
Музыкі надавалі ўвагу працы з фанэтыкай, вымаўляючы ўсе словы, як тое меркавалася ў арыгінале. Дзеля гэтага музыкі працавалі над альбомам разам з навукоўцамі – Станіславам Акінчыцам, Аляксандрам Глушком, Эдвардам Зайкоўскім. «Мы адкрылі новы кірунак – музычнае дасьледаваньне, – кажа З.Сасноўскі. – На дыску, акрамя сьпеваў, можна знайсьці падрабязныя гістарычныя камэнтары да кожнага зь іх». Лідэр «Старога Ольсы» робіць папраўку на тое, што яны наблізіліся да арыгіналу, «але ніхто дакладна ня можа сказаць наколькі».
У «Гераічным эпасе» нават добра абазнаных слухачоў чакае нямала знаходак, як то беларускі варыянт духоўнага гімну «Багародзіца» ці баляда «Падымалісь чорны хмары», час стварэньня якой дасьледчыкі адносяць да часоў татарскіх нашэсьцяў.
Альбом зь пераможнымі песьнямі гурт прэзэнтуе 16 красавіка ў Палацы прафсаюзаў. Каб перадаць тагачасную музычную атмасфэру, «Стары Ольса» запрасіў дадатковых музыкаў. Для кожнай песьні падабраныя адпаведныя па часе інструмэнты – дуды, жалейкі, гусьлі, лютні, ліра, бубны.
Сяргей Будкін
Канцэрт адбудзецца 16 красавіка ў Палацы прафсаюзаў. Пачатак у 19.00.
-
Мінская мастачка кажа, што 10 гадоў таму ў яе забрала карціны куратарка выставы — і дагэтуль не вярнула. А сама эмігравала
-
Ультыматум Пуціну з лазні і абмеркаванне бургераў. Новыя пародыі на Лукашэнку рвуць інстаграм
-
Фядута: Праз тое, што кнігі і рукапісы паляць не публічна, як у фашысцкай Германіі, а таемна, рэжымы не робяцца менш фашысцкімі
Цяпер чытаюць
Міжнародны крымінальны суд пачаў расследаванне злачынстваў, здзейсненых рэжымам Лукашэнкі13
Каментары