Haściej kaviarni prosiać sychodzić, kali jany biaruć kavu z saboj. A tak možna?
U Threads zavirusiŭsia post z apisańniem situacyi ŭ adnoj ź minskich kaviarniaŭ. Aŭtar raspavioŭ, što zamoviŭ kavu z saboj, a paśla pryhatavańnia napoju jaho paprasili syści z ustanovy. Usio z-za farmatu zamovy — «navynas». Onliner vyśvietliŭ u jurysta, ci pravamierna tak rabić.
Post za dzień nabraŭ tysiačy prahladaŭ i kala sotni kamientaroŭ.
«Ceny va ŭstanovie i navynas byccam by adnolkavyja, amal usie stoliki volnyja. Realna cikava daviedacca, u čym sens takoj surovaj siehrehacyi haściej», — adznačyŭ małady čałaviek.
Što havorać u kaviarni?
Pa kamientar žurnalisty źviarnulisia ŭ tuju samuju kaviarniu UGL, jakaja znachodzicca na Haradskim Vale. Tam kažuć, što ŭsia sprava ŭ vajbie.
— My nikoha nikoli nie vyhaniali. Naša palityka nakiravana na maksimalnaje skaračeńnie spažyvańnia adnarazovaha posudu. I ekałahičnaść jak hustu, tak i sposabu ŭžyvańnia.
A ŭnutry ŭstanovy ličym heta častkaj pavahi da kultury. My zakładali hetyja standarty i pavažliva ich tłumačym. My zaŭsiody ŭdakładniajem i, kali hość kaža, što jamu treba syści, barysta mamientalna pieralivaje napoj [u adnarazovy posud]. Spadziajomsia na razumieńnie i ŭzajemapavahu, — adkazali žurnalistam Onlíner va ŭstanovie.
Ekśpierymient
Darečy, užo paśla źjaŭleńnia pasta ŭ Threads ekśpierymient u kaviarni vyrašyła pastavić barysta pa imi Alisa.
Dziaŭčynie prapanavali vypić kavu z posudu, jaki stvaraje «asablivy vajb». Havorka pra kieramičnyja kubki, jakija nahadvajuć miatyja płastykavyja kubački. Ale pry hetym opcyja ŭziać kavu z saboj u adnarazovym posudzie taksama jość.
Mierkavańnie kamientataraŭ
Mierkavańni kamientataraŭ tradycyjna padzialilisia. Niechta kateharyčna admaŭlajecca pryniać takuju kancepcyju, a niechta nie ŭbačyŭ u joj ničoha strašnaha. Tym bolš taki pryncyp časta sustrakajecca ŭ inšych krainach.
«Kali b było «na miescy», to jon by [barysta] jašče i dźviery na kluč začyniŭ, pakul nie dapjecie svaju kavu».
«Ja b nie sychodziła. Ja b siadzieła».
«U ich tam staić śpiecyjalnaja prahrama ŭliku zakazaŭ, i barysta ŭ joj usio adznačaje, heta značyć kali ŭ prahramie paznačana «navynas», to ŭborka stała nie praduhledžana, a kroški i pustaja šklanka zastanucca».
«Sutyknułasia z takoj ža situacyjaj. Zaŭsiody biaru vialikuju kavu i pry zamovie ŭdakładniaju, što budu «na miescy», ale kavy chaciełasia b u šklanačku z saboj. Mnie admovili. Akiej, prysieła na 15 chvilin, i pryjšłosia pakinuć niedapity napoj i syści».
«Apuścim toj fakt, što kamuści padabajecca pić kavu z papiarovaha kubačka i ablizvać płastykavyja viečki. Vierniemsia da hałoŭnaha: farmat «siadzieć va ŭstanovie z adnarazovym posudam» — heta historyja pra fastfud-sietki. Kava ≠ fastfud. Tym bolš kali jość kuchnia i servis».
«Rastłumačcie mnie, kali łaska, čamu niekatoryja zamaŭlajuć napoj u bumažnym (nasamreč, paŭpłastykavym) kubku, kali siadziać unutry? Heta namierany antyekałahičny akt niejki?»
Adkaz jurysta
Što kaža pra hety vypadak zakon, žurnalisty vyrašyli daviedacca ŭ jurysta pa abaronie pravoŭ spažyŭcoŭ Ivana Rajkieviča:
— Ni zakon «Ab abaronie pravoŭ spažyŭcoŭ», ni praviły prodažu asobnych vidaŭ tavaraŭ i ažyćciaŭleńnia hramadskaha charčavańnia nie ŭtrymlivajuć normy, jakaja b dazvalała vydalać spažyŭca z kafe, kali jon kupiŭ kavu z saboj.
Bazavaje prava spažyŭca, praduhledžanaje art. 5 zakona «Ab abaronie pravoŭ spažyŭcoŭ», heta prava na svabodny vybar tavaraŭ, rabot i pasłuh. Kupiŭ spažyviec kavu z saboj, a paśla vyrašyŭ hetuju ž nabytuju kavu ŭžyć u kaviarni — heta jaho prava. Niemahčyma ŭkazać spažyŭcu, dzie jamu ŭžyvać nabytuju ŭ kaviarni kavu, na miescy abo za miežami kaviarni, navat kali prapisać heta ŭ praviłach absłuhoŭvańnia spažyŭcoŭ u kankretnaj kaviarni.
I davajcie nie budziem zabyvać, što prośba pakinuć ustanovu — heta ŭsiaho tolki prośba, jaje vykonvać nie abaviazkova. Tym bolš, što jana, miakka kažučy, nie adnosicca da patrabavańniaŭ zakanadaŭstvam.
Ciapier čytajuć
U restaranie «Mak.baj» na zahad Łukašenki pierajmienavali amierykana. Jak nazvali?27
Kamientary