Sud abaviazaŭ homielskaha aktyvista Kanstancina Žukoŭskaha vypłacić padatak na dachody za ŭsio žyćcio ŭ pamiery 2 młn. 150 tys. rubloŭ
Sud Centralnaha rajona Homiela abaviazaŭ miascovaha demakratyčnaha aktyvista Kanstancina Žukoŭskaha vypłacić padatak na dachody na ŭsio žyćcio ŭ pamiery 2 młn. 150 tys. rubloŭ.
Adpaviednaje paviedamleńnie rehijanalny kaardynatar arhkamitetu pa stvareńni partyi Biełaruskaja Chryścijanskaja Demakratyja atrymaŭ 7 sakavika. U liście ŭkazvajecca, što sud zadavoliŭ isk padatkovaj inśpiekcyi Centralnaha rajona i vynies rašeńnie abaviazać aktyvista vypłacić padatki na dachody na ŭsio žyćcio pačynajučy z 18-hadovaha ŭzrostu (ciapier K.Žukoŭskamu 32 hady).
K.Žukoŭski paviedamiŭ BiełaPAN, što zhodna z paviedamleńniem sudovaje pasiadžeńnie pa isku prajšło 29 lutaha. Adnak nijakich pozvaŭ, pavodle słoŭ aktyvista, jon nie atrymlivaŭ. U toj ža dzień, 29 lutaha, u Homielskim abłasnym sudzie K.Žukoŭski abskardziŭ patrabavańnie padatkavikoŭ vypłacić štraf za viasielny padarunak. U zadavalnieńni skarhi aktyvistu było admoŭlena, i jon pavinien zapłacić 1 młn. 750 tys. rubloŭ. Takim čynam, ahulny doŭh K.Žukoŭskaha pierad kaznoj składaje amal 4 młn. rubloŭ.
«Heta ŭžo poŭnaje biazładździe, ciapier maja čarha padavać u sud na padatkavikoŭ. Jany zapatrabavali dekłaracyju za ŭsio žyćcio — ja što, musiŭ ź junackich hadoŭ zapisvać, što mnie daryli i što ja zarablaŭ? Ja tak i napisaŭ u ich dekłaracyi, što płacić ničoha nie budu, bo patrabavańnie heta niezakonnaje. Usie dachody ja maju dziakujučy ŭpartaj pracy. Ja šmat hadoŭ pracavaŭ budaŭnikom. Jašče ja napisaŭ na dekłaracyi «Hańba!» i što nastanie čas, kali ŭsie buduć adkazvać za svaju manu», — zajaviŭ K.Žukoŭski.
Aktyvist zaznačyŭ, što daviedki ab dachodach za 14 hadoŭ jon nie pradstaŭlaŭ, tamu nie razumieje, adkul uziata mienavita takaja suma padatkaŭ, ekvivalentnaja 1.000 dołaraŭ ZŠA. K.Žukoŭski zajaviŭ ab namiery padać u sud na padatkovuju inśpiekcyju, jak tolki źbiare dastatkovuju sumu dla vypłaty dziaržpošliny.
Ciapier čytajuć
Radzilnyja damy spaborničajuć, u kaho 3 lipienia narodzicca bolš dziaciej5
Kamientary