Jarmošyna: Havorki pra źmienu vybarčaha zakanadaŭstva najbližejšym časam nie idzie

Źmienaŭ vybarčaha zakanadaŭstva ŭ Biełarusi najbližejšym časam nie budzie, zajaviła 12 lutaha staršynia Centrvybarkama Lidzija Jarmošyna.

Jak paviedamlałasia raniej, siońnia kiraŭnik CVK sustrakałasia z Alaksandram Łukašenkam. Abmiarkoŭvałasia vynikovaja spravazdača misii naziralnikaŭ Biuro pa demakratyčnych instytutach i pravach čałavieka (BDIPČ) ABSIE ab prezidenckich vybarach 2015 hoda. Łukašenka daručyŭ stvaryć mižviedamasnuju ekśpiertnuju hrupu dla vyvučeńnia rekamiendacyj BDIPČ.

Pavodle słoŭ Jarmošynaj, ekśpiertnaja hrupa budzie stvoranaja ŭžo siońnia, a pieršaje jaje pasiadžeńnie płanujecca pravieści 16 lutaha. CVK abahulnić vysnovy hrupy i padaść prezidentu napiaredadni parłamienckich vybaraŭ prapanovy ab udaskanaleńni vybarčaha pracesu.

«Tym nie mienš adrazu mahu skazać, što, viadoma, havorka nie moža iści najbližejšym časam pra źmienu vybarčaha zakonu. Hetyja prapanovy buduć realizoŭvacca šlacham udaskanaleńnia pravaprymianialnaj praktyki, jakaja vyznačajecca mietadyčnymi tłumačeńniami Centrvybarkama», — cytuje Jarmošynu pres-słužba prezidenta.

Pry hetym jana adznačyła, što CVK «užo daŭno pravodzić pracu pa vyvučeńni hetych rekamiendacyj i prymianieńni ich na praktycy padčas parłamienckich vybaraŭ, jakija majuć adbycca». «Tym nie mienš my ličym, što tut nieabchodny kompleksny padychod dla taho, kab u hetaj pracedury ŭdzielničała nie tolki Centralnaja kamisija, ale i našy najbolš aŭtarytetnyja dziaržaŭnyja orhany na ŭzroŭni ekśpiertaŭ, jakija b taksama vykazali svaju pazicyju adnosna dadzienych ABSIE prapanoŭ, a taksama vyznačyli šlachi realizacyi hetych prapanoŭ», — skazała Jarmošyna.

Nahadajem, u vynikovaj spravazdačy naziralnaj misii BDIPČ adznačajecca: «Prezidenckija vybary, jakija adbylisia 11 kastryčnika 2015 hoda, znoŭ pakazali, što Biełarusi jašče treba prajści značny šlach da vykanańnia abaviazacielstvaŭ ABSIE pa demakratyčnych vybarach. Heta padkreślivaje nieabchodnaść palityčnaj voli dla praviadzieńnia ŭsioabdymnaha pracesu reformaŭ». Naziralniki źviarnuli ŭvahu na niekatoraje palapšeńnie i «haścinnaje staŭleńnie» uładaŭ Biełarusi da misii, adznačyli, što vybarčaja kampanija i niepasredna dzień vybaraŭ prachodzili mirna. Ale «značnyja prablemy, asabliva padčas padliku hałasoŭ i sumavańnia vynikaŭ hałasavańnia, padarvali sumlennaść vybaraŭ», havaryłasia ŭ spravazdačy misii.

U BDIPČ miarkujuć, što ŭłady Biełarusi hatovyja realizavać šerah rekamiendacyj spravazdačy da čarhovych (parłamienckich) vybaraŭ, jakija pavinny prajści nie paźniej za 11 vieraśnia 2016 hoda. «Ja baču hatoŭnaść aficyjnych asob abo jak minimum niejkaj ich častki realna realizoŭvać tyja źmieny, jakija pryviaduć Biełaruś značna bližej da mižnarodnych standartaŭ u halinie vybaraŭ», — skazaŭ žurnalistam dyrektar BDIPČ Michael Hieorh Link padčas vizitu ŭ Minsk 29 studzienia.

Adnak jašče raniej Lidzija Jarmošyna zajaŭlała, što prapanova BDIPČ źmianić vybarčaje zakanadaŭstva da parłamienckich vybaraŭ supiarečać dakumientam Vieniecyjanskaj kamisii, jakaja rekamienduje ŭnosić takija źmieny nie mienš jak za hod da praviadzieńnia vybaraŭ.

Kamientujučy pazicyju kiraŭnika CVK, Link nazvaŭ heta «pytańniem pryjarytetaŭ». «Vieniecyjanskaja kamisija rekamienduje nie źmianiać fundamientalna vybarčaje zakanadaŭstva niezadoŭha da vybaraŭ, i BDIPČ taksama heta nie rekamienduje», — adznačyŭ jon.

U svaju čarhu kiraŭnik misii karotkaterminovych naziralnikaŭ na prezidenckich vybarach u Biełarusi Kient Charsted, jaki naviedaŭ Minsk razam ź Linkam, dadaŭ: «Tut treba ŭličvać sutnaść źmianieńniaŭ, jakija ŭnosiacca. Kali hetyja źmieny pryniasuć palapšeńnie situacyi dla vybarščykaŭ, kandydataŭ, dla duchu demakratyi… Nie dumaju, što hetaja rekamiendacyja (Vieniecyjanskaj kamisii) pieraškadžaje takim źmienam».

Charsted padkreśliŭ, što praceduru padliku hałasoŭ možna zrabić prazrystaj da parłamienckich vybaraŭ 2016 hoda. «Nie pahłyblajučysia ŭ detali, skažu, što adnym ź niedachopaŭ, jakija sapraŭdy nieabchodna vypravić da parłamienckich vybaraŭ hetaha hoda, źjaŭlajecca niemahčymaść naziralnikaŭ sačyć za padlikam hałasoŭ. My vielmi spadziajemsia, što hety niedachop budzie vypraŭleny ŭžo sioleta», — skazaŭ pradstaŭnik ABSIE.

• 0
• 0
• 0
• 0
• 0
• 0
• 0
• 0