BT: Toje, što kandydaty vystaŭlajuć u internet svaje vystupy na telebačańni, niezakonna
Raźmiaščeńnie ŭ internecie kandydatami ich pieradvybarnych vystupleńniaŭ, pakazanych da hetaha pa telebačańni, niezakonnaje, havorycca ŭ kamientaryi, raspaŭsiudžanym 19 žniŭnia pres-słužbaj Biełteleradyjokampanii.
«Nie prajšło i troch dzion z pačatku tranślacyi vystupleńniaŭ kandydataŭ u deputaty ŭ efiry telekanała «Biełaruś 3» Biełteleradyjokampanii, a niekatoryja z kandydataŭ užo vykazali niezvyčajnuju vynachodlivaść u śfiery svajoj ahitacyi, — skazana ŭ kamientaryi. — Asobnyja ŭdzielniki pieradvybarnaj honki naohuł vyrašyli papijarycca za košt pracy miedyjachołdynha, raźmiaściŭšy vystup, prafiesijna zapisany rabotnikami BT, u internecie, pry hetym nie atrymaŭšy dazvoł na hety krok va ŭłaśnika videamateryjału, jakim źjaŭlajecca Nacyjanalnaja teleradyjokampanija Biełarusi, a ŭ dalejšym jašče i abvinavaciŭšy jaje ŭ błakavańni niezakonna raźmieščanaha kantentu».
«Ličym, što čałaviek, nie daloki ad telebačańnia, vydatna viedaje, što byvaje ŭ vypadku niezakonnaha vykarystańnia čužych videamateryjałaŭ. U inšym ža vypadku jamu, roŭna jak i inšym patencyjnym narodnym abrańnikam, jakija ličać siabie zdolnymi zajmacca zakanatvorčaściu ŭ parłamiencie, nieabchodna aznajomicca ź vialikimi prapisnymi iścinami dziejnaha zakanadaŭstva», — miarkujuć na BT.
Vierahodniej za ŭsio, havorka idzie pra rolik z vystupam kandydata ŭ deputaty, režysiora i aktyvista Abjadnanaj hramadzianskaj partyi Juryja Chaščavackaha, raźmieščanaha napiaredadni na Youtube, a 19 žniŭnia vydalenaha z servisu, chutčej za ŭsio, na padstavie zvarotu pravaŭładalnika.
«Ličym taksama, što šyrokija mahčymaści sučasnych miedyja, u tym liku internetu i sacsietak, dazvalajuć lubomu z kandydataŭ u deputaty raźmiaščać samastojna stvoranyja videa-, aŭdyja- i inšyja materyjały ahitacyjnaha charaktaru», — praciahnuli ŭ Biełteleradyjokampanii.
Ciapier čytajuć
U Biełarusi znajšli kopiju šviejcarskich Alpaŭ — ale turystaŭ tam nie čakajuć2
Kamientary