Vajskoŭcy i finansisty Rasii nie zmahli damovicca pra vydatki na pieraŭzbrajeńnie armii
Minfin i Minabarony Rasii nie ŭzhadnili abjom finansavańnia dziaržaŭnaj prahramy ŭzbrajeńnia na 2018—2025 hady, piša kommersant.ru.
Ministr abarony Siarhiej Šajhu patrabavaŭ 22 trłn rubloŭ, a ministr finansaŭ Anton Siłuanaŭ kazaŭ tolki pra 12 trłn.
Takim čynam, finansisty hatovyja dać na hetyja mety na 10 tryljonaŭ rasijskich rubloŭ ($15,4 młrd pa siońniašnim kursie) mieniej, čym chočuć vajskoŭcy.
Apošni raz pytańnie hrašovaha zabieśpiačeńnia DPU-2025 abmiarkoŭvałasia z udziełam prezidenta Rasii Uładzimira Pucina 9 vieraśnia. Paśla abmierkavańnia nijakich kamientaroŭ ad Minfina, Minabarony ci Kramla nie było.
Pry hetym u 2014 hodzie vajskoŭcy zajaŭlali, što im spatrebiacca na tuju ž prahramu 30 trłn rubloŭ.
Vydańnie sa spasyłkaj na krynicu paviedamiła, što Minabarony spasyłałasia padčas narady na niemahčymaść vykanańnia pucinskaha ŭkaza, zhodna ź jakim da 2020 hoda rasijskaja armija pavinna na 70% pieraŭzbroicca sučasnaj technikaj.
U svaju čarhu finansisty kazali pra toje, što ŭ sučasnych ekanamičnych realijach dziaržaŭny biudžet nie vytrymaje takoha ciažaru, u tym liku ŭ śfiery vykanańnia sacyjalnych abaviazkaŭ.
DPU-2015 pavinna była pačać pracavać užo ŭ hetym hodzie, ale ŭ suviazi z ekanamičnymi prablemami jaje pačatak pieranieśli na 2 hady — na 2018 hod. Ciapier dziejničaje DPU-2020, jakaja była ŭžo skaročanaja z 36 trłn rubloŭ da 23 trłn.
DPV-2025 pavinna być pryniataja ŭ 2017 hodzie.
U 2016 hodzie na vajennyja mety Rasija płanavała addać 19,2% biudžetu. Jašče 12,7% — na śpiecsłužby i pravaachoŭnyja orhany.
Kamientary