Abvinavačanyja pa spravie «žyvy ščyt»: «Nie vinavatyja my»
Siońnia pieršy dzień pracesu.
Abvinavačanyja pa spravie ab «žyvym ščycie» supracoŭniki Dziaržaŭtainśpiekcyi Hienadź Darahakupiec i Alaksiej Lichtarovič nie pryznali siabie vinavatymi. Milicyjaniery abvinavačvajucca ŭ złoŭžyvańni ŭładaj abo słužbovymi paŭnamoctvami (č. 1 art. 424 Kryminalnaha kodeksa).
Dziaržaŭny abvinavaŭca zajaviŭ, što ličyć vinu abvinavačanych poŭnaściu dakazanaj. Jon zaznačyŭ, što supracoŭniki DAI pieravysili svaje paŭnamoctvy pry stvareńni «žyvoha ščyta», stvaryli pahrozu žyćciu, zdaroŭju i zachavanaści asabistaj majomaści hramadzian, a taksama dyskredytavali svaim učynkam Ministerstva ŭnutranych spraŭ. Na dumku abvinavačańnia, vina milicyjanieraŭ dakazana pakazańniami samich supracoŭnikaŭ DAI, paciarpiełych, śviedak, a taksama materyjałami kryminalnaj spravy — ahladam miesca zdareńnia, schiemaj DTZ, fotazdymkami, stenahramami pieramoŭ supracoŭnikaŭ DAI i inšymi materyjałami.
***
U budynak suda puścili tolki pišučych žurnalistaŭ, žurnalistam z fotaaparatami i kamerami ŭvachod zabaronieny. Navat nie dapuścili zdymačnyja hrupy biełaruskich telekanałaŭ, a taksama kanałaŭ Mir i Pieršaha rasiejskaha kanału.
Aproč taho, hledačy i žurnalisty, uvajšoŭšy ŭ zalu suda, byli ździŭleny, što zala ŭžo zapoŭnienaja častkova niejkimi ludźmi: hety pry tym, što da aznačanaha času nikoha ŭ sud nie zapuskali.
***
Abvinavačańni ŭ słužbovych złoŭžyvańniach vystaŭlenyja dvum supracoŭnikam DAI im pahražaje da 3 hadoŭ źniavoleńnia.
Spravu pra «žyvy ščyt» razhladaje sudździa Iryna Majko.
Pierad pačatkam pasiedžańnia na hanku suda sabrałasia kala 40 čałaviek, mnoha žurnalistaŭ.
Abvinavačańnie pradjaŭlena dvum supracoŭnikam DAI Kastryčnickaha rajonu Miensku. U dačynieńni da jašče dvuch milijacyjantaŭ kryminalnaja sprava była spyniena z pryčyny adsutnaści ŭ ich dziejańniach składu złačynstva.
Kožny z šaści paciarpiełych padaŭ hramadzianski pazoŭ u dačynieńni da supracoŭnikaŭ DAI na sumu 50 młn rubloŭ u jakaści kampensacyi maralnaha ŭronu. Aproč taho, paciarpiełyja vystavili pazoŭ u pamiery 25 młn rubloŭ u jakaści kampensacyi materyjalnaha ŭronu.
***
Nahadajem, što 2 sakavika ŭviečary supracoŭniki DAI, kab zatrymać pjanoha Ramana Mienciuka, jaki lacieŭ na svaim «Falksvahienie‑Holf» z chutkaściu 160 km /h, vystavili na 8-m kilametry trasy Miensk — Mikaševičy (la vioski Sieńnica) ščyt z aŭtamabilaŭ, u jakich znachodzilisia pasažyry ź dziećmi. U vyniku sutyknieńnia mašyny Mienciuka ź impravizavanym žyvym ščytom traŭmy atrymali niekalki čałaviek, mašyny byli paškodžanyja.
Sprava atrymała rozhałas tolki praz dva tydni. Ale napačatku supracoŭniki DAI admaŭlali niepravamiernaść svaich dziejańniaŭ.
Namieśnik upraŭleńnia Dziaržaŭtainspekcyi MUS pałkoŭnik Ihar Vanicki navat zajaviŭ na admysłovym bryfinhu, što sutyknieńnie aŭtamabila «Falksvahien Holf», za rulom jakoha jechaŭ Mianciuk, z mašynami ludziej, što jechali ŭ Miensk, a taksama aŭtamabilami supracoŭnikaŭ DAI, adbyłosia ŭ vyniku taho, što "kiroŭcy hramadzianskich aŭto, spyniŭšy svaje transpartnyja srodki, niapravilna zrazumieli žest supracoŭnika DAI, jaki patrabavaŭ praciahvać ruch u kirunku Miensku".
Raman Mianciuk, u dačynieńni da jakoha była zaviedziena kryminalnaja sprava, pakinuŭ Biełaruś i abvieščany ŭ vyšuk.
Kamientary