Prymusovaje viartańnie samalota «Biełavija» ŭ Kijeŭ pad pahrozaj prymianieńnia siły, u tym liku bajavoj avijacyi, — heta parušeńnie mižnarodnaha avijacyjnaha prava, zajaviŭ 2 listapada na pres-kanfierencyi ŭ Minsku dyrektar departamienta pa avijacyi Ministerstva transpartu i kamunikacyj Biełarusi Uładzimir Kościn.
Jon padkreśliŭ, što viartańnie samalotaŭ na aeradrom vyletu z-za ŭmoŭ nadvorja, techničnaj pryčyny abo chvaroby pasažyra — heta narmalnaja praktyka. «Ale kali kazać pra hety kankretny vypadak, kali viartańnie adbyvajecca pavodle kamandy dyśpietčara i kažuć, što pry nievykanańni kamandy buduć padniatyja źniščalniki, vajennaja avijacyja, to heta nienarmalnaja situacyja. Ja sam pralataŭ 30 hadoŭ, viedaju piłotaŭ-vieteranaŭ i mahu zajavić, što takoha vypadku ŭ našaj praktycy nie było, — parušeńnie mižnarodnych normaŭ i praviłaŭ», — padkreśliŭ Kościn.
«Napeŭna, hetaha pasažyra možna było prasačyć jašče pry pracesie rehistracyi ŭ aeraporcie — pierad pasadkaj na bort. A kali hetaha nie adbyłosia i źjaviłasia niejkaja dadatkovaja infarmacyja, jakaja patrabavała viartańnia hetaha pasažyra, — jość mižnarodnyja normy, cyvilizavanaja praktyka, možna było pa inšych miždziaržaŭnych kanałach spryjać vydačy hetaha pasažyra. U hetym vypadku viartańnie samalota mienavita pry pahrozie vykarystańnia bajavoj avijacyi — heta parušeńnie ŭsich mižnarodnych kanviencyj i ŭmiašańnie ŭ dziejnaść mižnarodnaj hramadzianskaj avijacyi», — zajaviŭ kiraŭnik departamienta.
Ekipaž, na jaho dumku, dziejničaŭ pravilna, tamu što byŭ abaviazany vykanać kamandu dyśpietčara. «Nu a raptam by, da prykładu, ujavim, što ekipaž nie vykanaŭ by kamandu dyśpietčara i była b usio ž taki padniataja bajavaja avijacyja? Napeŭna, heta ŭsio b pierarasło ŭ bolš składany kanflikt», — adznačyŭ Kościn.
«Kali małaja adlehłaść pamiž aeraportami, heta nabor vyšyni i adrazu źnižeńnie. Samalot nie spyniš, jon lacić ź vialikaj chutkaściu. Heta treba było całkam mianiać prahramu palotu, u tym liku ŭ kampjutary na borcie pavietranaha sudna», — rastłumačyŭ dyrektar departamienta avijacyi.
«Ja liču, kali zdaryłasia pamyłka, ukrainskamu boku, viadoma, varta było b prynieści prabačeńni. Ale na siońniašni dzień, na žal, niama nijakaj reakcyi z boku Ukrainy, i niama naohuł kamientaryjaŭ ź ich acenkaj hetaha, što jany pra heta ŭsio dumajuć», — skazaŭ Kościn. Biełaruski bok, ličyć jon, «pastupiŭ pravilna». «Treba adstojvać svaje intaresy i treba, kab nas pavažali», — dadaŭ pradstaŭnik Mintransa.
***
Samalot «Boinh 737-800» (bartavy numar EW-456PA) avijakampanii «Biełavija», jaki vykonvaŭ rejs V2-840 pa maršrucie Žulany (Kijeŭ) — Minsk, 21 kastryčnika byŭ viernuty ŭ aeraport vyletu pavodle patrabavańnia Słužby biaśpieki Ukrainy. Ekipažu było zajaŭlena, što ŭ vypadku nievykanańnia kamandy ŭ pavietra buduć padniatyja źniščalniki. U vyniku pravaachoŭnyja orhany Ukrainy źniali z rejsa «Biełavija» adnaho pasažyra — hramadzianina Armienii Armiena Marcirasiana. Paśla pravierki jon byŭ adpuščany i vylecieŭ u Biełaruś nastupnym rejsam.
U SBU ciapier zajaŭlajuć, što nie davali dyśpietčaram nijakich ukazańniaŭ adnosna bajavoj avijacyi dla viartańnia samalota.
MZS Biełarusi zajaviŭ pratest i ŭručyŭ notu Ukrainie ŭ suviazi z prymusovaj pasadkaj u Kijevie biełaruskaha łajniera. Biełaruski bok zapatrabavaŭ kampiensacyi ŭsich finansavych vydatkaŭ i vydatkaŭ.
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam25
Kamientary