Biełaruski piśmieńnik i navukoviec Ivan Savierčanka atrymaŭ premiju «Zorka sadružnaści», jakaja praduhledžvaje salidnuju hrašovuju ŭznaharodu — 2 miljony rasijskich rubloŭ. Heta kala $34 tysiač u ekvivalencie. Hrošy vypłačvajucca ź biudžetu Sajuznaj dziaržavy, jaki napaŭniajuć Rasija i Biełaruś.
Niekali takuju premiju atrymlivali Mikałaj Čarhiniec (pretendavaŭ i sioleta) i namieśnik ministra infarmacyi Aleś Karlukievič.
Ivan Savierčanka — navukoviec i litaratar u adnoj asobie, dyrektar Instytuta litaraturaznaŭstva imia Janki Kupały Nacyjanalnaj Akademii navuk.
Jak patłumačyŭ «Našaj Nivie» Savierčanka, «Zorku sadružnaści» jon atrymaŭ za ŭsiu svaju tryccacihadovuju dziejnaść.
«Ja zrabiŭ pierakłady pomnikaŭ staražytnaha biełaruskaha piśmienstva na ruskuju movu — jany šyroka vykarystoŭvajucca studentami krain SND. Taksama jość histaryčnyja knihi z narysami i ese. «Ułada piačatki», naprykład, «Blask Karony». Heta pra našych znakamitych asobaŭ, pačynajučy ad Rahvałoda, u tym liku pra Mindoŭha, Vitaŭta, Sapiehu», — skazaŭ łaŭreat.
Varta adznačyć, što Savierčanka ŭ 1990-ja daśledavaŭ žyćcio vybitnych dziejačaŭ ajčynnaj hitoryi — paplečnika Iasafata Kunceviča Jazepa Ruckaha, addanaha patryjota VKŁ Astafieja Vałoviča dy inšych.
Ci nie byli abranyja im asoby pieraškodaj dla pryznańnia ŭ Rasii?
«Zhadanych vami asobaŭ mo i ŭ Biełarusi chtości ŭsprymaje ź niehatyvam. A intelektualnyja koły Rasii… jany ŭsprymajuć absalutna adekvatna, viedajuć historyju, cikaviacca. Tak, u Rasii jość i ludzi ź impierskimi ambicyjami, ale jość i adukavanyja ludzi. Prynamsi tyja, ź jakimi ja kantaktuju, narmalna staviacca da našaj kultury. Ja niekali vydavaŭsia ŭ Maskvie, i tamtejšy dyrektar vielmi plažyŭ redaktaraŭ, kali jany čaplalisia da niejkich maich charaktarystyk taho ž Lva Sapiehi ci Ruckaha. Dla jaho było važna, kab my mahli raskazać pra svaich dziejačaŭ praŭdziva. Ja za toje, kab zapanavali abjektyŭnyja pohlady na našuju historyju i kulturu. Danošu heta ŭ asiarodku navukoŭcaŭ», — skazaŭ łaŭreat.
Što budzie rabić z hrašyma, Savierčanka jašče nie vyrašyŭ.
«Treba najpierš pakryć tyja vydatki i kredytorskija zapazyčanaści, jakija ja maju. Takija tvorčyja rečy patrabujuć vialikaj achviarnaj pracy, roznych vydatkaŭ. Lubaja premija nie pakryvaje navat dziasiataj doli tych vydatkaŭ, jakija čałaviek unosić. Zadavalnieńnie ad taho, što zaŭvažyli, — heta tak. Ale ci kampiensuje jano? Heta pamyłka tak dumać».
Ciapier čytajuć
Na pratestancki fiestyval u «Čyžoŭku-Arenu» jedzie amierykanski prapaviednik Franklin Hrem. Razam ź im čakajuć Koŭła z žonkaj8
Kamientary