HUAM stanovicca paŭnavartasnaj rehijanalnaj arhanizacyjaj

Siońnia ŭ Kijevie prajšoŭ samit HUAM - sustreča prezydentaŭ Hruzii, Ukrainy, Azerbajdžanu j Małdovy. Jany padpisali statut novaj mižnarodnaj arhanizacyi, jaka budzie nazyvacca «Za demakratyju i ekanamičnaje raźvićcio - HUAM». Stały sakrataryjat hetaj arhanizacyi budzie raźmieščany ŭ Kijevie. Na samicie šmat kazali pra dolu SND sa štab-kvateraj u Miensku.

HUAM u novym farmacie stanie mižnarodnaj arhanizacyjaj, čyj statut budzie zarehistravany ŭ AAN. Pra HUAM i raniej kazali jak pra alternatyvu SND abo supraćvahu EŭrAzES, a ciapier HUAM sapraŭdy robicca takoj ža paŭnavartasnaj rehijanalnaj arhanizacyjaj na postsavieckaj prastory.

Adnačasova lidery Hruzii, Ukrainy, Azerbajdžanu j Małdovy praciahvajuć zajaŭlać, što sajuz čatyroch dziaržavaŭ nia jość alternatyvaj SND, chacia apošniaja j vyklikaje šmat krytyki.

Varta nahadać, što aficyjnyja pradstaŭniki Hruzii dy Ŭkrainy navat zajavili pra mažlivy vychad z SND. Ale paźniej ukrainski ministar zamiežnych spravaŭ Barys Tarasiuk zajaviŭ, što heta nia bolš, čym razmovy.

Žurnalisty na presavaj kanferencyi pa vynikach kijeŭskaha samitu HUAM usio adno pytalisia pra los SND. Viktar Juščanka doŭha adkazvaŭ na hetaje pytańnie j siarod inšaha skazaŭ:

(Juščanka: ) «Nu jak my možam nazyvacca siabrami, susiedziami, kali z kožnaj krainaj, jakaja ŭ SND, jakaja ŭ inšych tam mižnarodnych instytutach, nie adrehulavanyja pytańni miažy? Heta nia varta. Heta nas nie zadavalniaje. My robim prapanovy lohiki demarkacyi, delimitacyi miežaŭ - heta nie ŭsprymajecca».

Spadar Juščanka nie nazvaŭ kankretnuju krainu–susiedku Ŭkrainy, adnak hałoŭnyja ŭkrainskija prablemy ź miažoj źviazanyja mienavita ź Biełaruśsiu. Alaksandar Łukašenka bolš za 8 hadoŭ tamu - 5 traŭnia 1998 hodu - publična zabaraniŭ ratyfikacyju damovy pra dziaržaŭnuju miažu z Ukrainaj, patrabujučy ad Kijeva viarnuć daŭhi pačatku 1990-ch hadoŭ.

Aficyjny Kijeŭ hety doŭh dziaržaŭnym nie pryznaje, adnak adsutnaść naležna aformlenaj miažy pieraškadžaje ŭstupu Ŭkrainy ŭ NATO. Užo ŭ listapadzie ŭ Ryzie projdzie samit NATO, na jakim Ukrainu mohuć zaprasić pačać pieramovy pra dałučeńnie da aljansu. Tamu na apošnim samicie ŭ Kazani Viktar Juščanka sprabavaŭ vynieści pytańnie miažy na ŭzrovień SND, ale marna.

Siońnia svaimi ŭražańniami ad taho samitu j padtrymkaj pazycyi Kijeva ŭ kanflikcie ź Mienskam padzialiŭsia hruzinski prezydent Michaił Saakašivli:

(Saaakašvili: ) «Ja sam asabista byŭ źniavažany, kali viadučyja prapanovy Ŭkrainy - zusim abhruntavanyja - prosta navat nie byli abmierkavanyja na sustrečach SND. Nia toje što abmierkavali dy arhumentavana admovili. Prosta nie abmierkavali! Ukraina - heta ž nia niejkaja tam vioska na apušcy lesu. Heta viadučaja kraina hetaj sadružnaści. I kali jaje tak ihnarujuć, dyk ciažka kazać pra bolš maleńkija krainy, jakija nia majuć takich resursaŭ, takich mahčymaściaŭ».

Adnak spadar Saakašvili prademanstravaŭ u Kijevie svaje mahčymaści, adkryŭšy tut napiaredadni samitu HUAM festyval hruzinskaha vina.

Uvieś Kijeŭ zaklejeny reklamnymi plakatami vina z Hruzii, dzie napisana: «Pasprabuj vino svabody. U im bolš svabody, čym heta dazvolena. Hruzinskaje vino zabaronienaje ŭ Rasiei».

Radyjo Svaboda

• 0
• 0
• 0
• 0
• 0
• 0
• 0
• 0