Top-5 važnych kaśmičnych misij, jakija ziamlanie płanujuć najbližejšym časam
Niepieraadolnaja ciaha čałaviectva da paznańnia suśvietu pryviała da stvareńnia nievierahodnych kaśmičnych mašyn, jakija zdolnyja pakidać našuju płanietu i adpraŭlacca da ŭsio bolš dalokich kaśmičnych abjektaŭ. Niadaŭna my pazbavilisia ŭnikalnaha kaśmičnaha zonda «Kasini», ale ŭžo ciaham nastupnych dziesiaci hod płanujecca vialikaja kolkaść novych kaśmičnych misij. My vybrali piać najbolš cikavych i važnych ź ich.
1. Čan'e-5
Kali: 30 listapada 2017 hoda
Kitajskaje nacyjanalnaje kaśmičnaje ahienctva ŭžo zusim chutka prystupić da vykanańnia kaśmičnaj misii «Čan'e-5», meta jakoj zaklučajecca ŭ adpraŭcy kaśmičnaha aparata da Miesiaca. Asnoŭnaja zadača — ažyćciaŭleńnie miakkaj pasadki pobač ź miesiacovym vułkaničnym utvareńniem i zbor uzoraŭ miesiacovaha hruntu z hłybini kala dvuch mietraŭ pad pavierchniaj spadarožnika. Jak tolki patrebnyja ŭzory buduć atrymanyja, ich dastaviać na pakinuty na arbicie Miesiaca kaśmičny aparat, a zatym pryviazuć na Ziamlu dla analizu.
2. InSight
Kali: 5 traŭnia 2018 hoda
Metaj adpraŭki amierykanskim kaśmičnym ahienctvam pasadačnaha modula InSight na Mars źjaŭlajecca vyvučeńnie na praciahu 720 dzion unutranaha składu Čyrvonaj płaniety dla atrymańnia bolš poŭnaj karciny pra toje, jakija pracesy sfarmavali jaje ŭnutranuju budovu šmat miljardaŭ hadoŭ tamu.
3. Parker Solar Probe
Kali: lipień 2018 hoda
Prahrama Soniečnaha zonda stavić za metu adpraŭku kaśmičnaha aparata na adlehłaść da dziesiaci soniečnych radyusaŭ ad samoj zorki, što našmat bližej, čym usie aparaty, jakija kali-niebudź tudy nakiroŭvalisia. Takaja blizkaja adlehłaść ad zorki dazvolić zondu sabrać biesprecedentnyja dadzienyja ab aktyŭnaści śviaciła i, mahčyma, navat stvaryć na bazie hetych dadzienych prahnoz patencyjnych katastrafičnych źmianieńniaŭ nadvorja, jakija mohuć čakać nas u budučyni.
4. Kaśmičny teleskop imia Džejmsa Ueba
Kali: pačatak 2019 hoda
Teleskop imia Džejmsa Ueba, jaki ŭjaŭlaje ź siabie značna palepšany kaśmičny teleskop «Chabł», što ŭžo dažyvaje svoj viek, abstalavany 6,5-mietrovym modulnym lustram. Jon budzie zapuščany z kasmadroma Kuru ŭ Francuzskaj Hvijanie. Adzin z navukovych instrumientaŭ hetaha kaśmičnaha teleskopa maje mnostva aptyčnych zatvoraŭ, jakija dazvalajuć jamu vieści adnačasovaje nazirańnie za dziasiatkami roznych kaśmičnych abjektaŭ.
5. Europa Clipper
Kali: prykładna 2025 hod
Prahrama budzie zaklučacca ŭ vyvučeńni spadarožnika hazavaha hihanta Jupitera — Jeŭropy — na pradmiet najaŭnaści prykmietaŭ žyćcia. Čakajecca, što kaśmičny aparat zrobić 45 poŭnych abarotaŭ vakoł tajamničaha spadarožnika, čyja pavierchnia składajecca ź lodu i źjaŭlajecca adnoj z samych hładkich u Soniečnaj sistemie: na joj vielmi mała krataraŭ, ale šmat raskolin. Hładkaść pavierchni pryviała da hipotezy, što pad joj znachodzicca vadziany akijan, u jakim nie vyklučajecca najaŭnaść mikraskapičnaha žyćcia.
Ciapier čytajuć
18‑hadovy kursant Vajskovaj akademii ź Lachavič nikomu ničoha nie skazaŭ, zabraŭ dakumienty i pajechaŭ vajavać za Rasiju. Ciapier pa im płačuć50
Kamientary