Deputatka Hujvik: Dać tapkam pa sr*cy dziciaci ci pa karku — heta pakarańnie, a nie hvałt
Novy vypusk pieradačy «Naša žyćcio» na telekanale ANT byŭ pryśviečany temie chatniaha hvałtu. Nahodaj staŭ zakon suprać chatniaha hvałtu i seksualnych damahańniaŭ, jaki rychtuje Ministerstva ŭnutranych spraŭ.
«My vyraśli ŭ saviecki čas. Tady baćki ličyli, kali ŭdaryŭ ramianiom, to abaviazkova vychavaŭ. I mnie pierapadała, — ličyć deputatka Pałaty pradstaŭnikoŭ, byłaja sudździa Natalla Hujvik. — I dakładna pamiataju za što. I bolš ja hetaha nie paŭtarała. U toj samy čas ja ŭžo ŭ adnosinach da svajho dziciaci hetaj praktyki nie prymianiała. Bo heta zastajecca ŭ pamiaci. Złoby niama. Ale dla niekatorych dziaciej heta stanovicca normaj.
Abaviazkova treba adroźnivać: ci heta pakarańnie, ci heta hvałt. Kali mama ci tata tapkam udarać, to heta nie hvałt, a pakarańnie. Navat carkoŭnyja słužki kažuć: kali daŭ pa karku, to heta ničoha nie značyć. A voś hvałt zusim inšuju formu prymaje. Dzieci majuć prava da 14 hadoŭ źviarnucca ŭ kamisiju pa spravach niepaŭnaletnich, a z 14 — u sud.
Kali ŭ nas budzie niejki pierahib, to ŭsie niepaŭnaletnija da 14 hadoŭ, kali ich tapkam pa sr*cy ŭdarać, pabiahuć u orhany apieki i kamisiju pa spravach niepaŭnaletnich. Jany buduć złoŭžyvać svaimi pravami».
Kałumnistka «Sovietskoj Biełoruśsii» Taćciana Sulimava skazała, što vykarystoŭvaje mietad «pa sr*cy» jak krajni ŭ svaich adnosinach ź dziećmi.
«Ja bju nie baluča, a kryŭdna. Ja bačyła, jak vychoŭvajuć himnastaŭ, jak ich bjuć, raściažka i hetak dalej. A jak inakš vychavać čempijona? Maju mamu bili, maju babulu bili. Ci moža hramadstva, vychavanaje na hetym stahodździami, u adzin momant admovicca?» — miarkuje jana.
Načalnik upraŭleńnia prafiłaktyki MUS Aleh Karaziej byŭ siarod tych, chto rašuča vystupaŭ suprać luboha chatniaha hvałtu ŭ adnosinach da dziaciej.
«Mianie baćki ŭ dziacinstvie nie bili. I heta nie značyć, što ja vyras niavychavanym ci što mnie čahości brakuje. Kali my kažam pra prajekt zakona, jaki prapanoŭvaje MUS, to jon całkam vyklučaje luboje fizičnaje ŭździejańnie. Kali my kažam, što dzicia možna bić, to chto viedaje, dzie znachodzicca miaža? Kali my bjom dzicia, to chto moža skazać, što my jaho vychoŭvajem?» — miarkuje Karaziej.
Ciapier čytajuć
Byłoha milicyjaniera asudzili za žadańnie vajavać u Pałku Kalinoŭskaha. Pahražała da 15 hadoŭ kałonii19
Kamientary