Bielhija aficyjna spyniła padrychtoŭku da demantažu ŭsich svaich atamnych reaktaraŭ i faktyčna źmianiła raniejšy kurs na poŭny vychad ź jadziernaj enierhietyki, piša Deutsche Welle.
Urad krainy razam z francuzskim enierhietyčnym kancernam Engie, jaki ciapier źjaŭlajecca apierataram bielhijskich AES, pačaŭ pieramovy ab mahčymaj pieradačy dziaržavie ŭsiaho atamnaha kompleksu krainy. Havorka idzie pra ŭsie siem reaktaraŭ, što znachodziacca na terytoryi Bielhii.
Na čas hetych pieramoŭ usie raboty pa demantažy i zakryćci reaktaraŭ buduć spynienyja. Ułady patłumačyli heta tym, što chočuć pakinuć adkrytymi ŭsie mahčymyja scenary raźvićcia situacyi.
Jašče niekalki hadoŭ tamu Bielhija płanavała całkam admovicca ad atamnaj enierhietyki. Dla hetaha dziejničaŭ śpiecyjalny zakon ab pastupovym zakryćci ŭsich reaktaraŭ. Adnak u 2025 hodzie parłamient admianiŭ hety zakon, paśla čaho ŭrad atrymaŭ mahčymaść pierahledzieć usiu enierhietyčnuju stratehiju krainy.
Pavodle papiaredniaj damoŭlenaści, dziaržava moža vykupić u Engie nie tolki sami reaktary, ale i ŭvieś źviazany ź imi kompleks. U jaho ŭvachodziać piersanał stancyj, daččynyja pradpryjemstvy, majomaść, techničnaja infrastruktura, a taksama finansavyja i jurydyčnyja abaviazki, u tym liku źviazanyja z budučym vyvadam reaktaraŭ z ekspłuatacyi.
Asnoŭnyja ŭmovy mahčymaha pahadnieńnia baki chočuć uzhadnić da 1 kastryčnika. Kali ździełka adbudziecca, francuzski kancern całkam pakinie jadzierny siektar u Bielhii.
Premjer-ministr krainy Bart De Vievier zajaviŭ, što jahony ŭrad vybiraje biaśpiečnuju, tańniejšuju i stabilnuju enierhietyku. Jon padkreśliŭ, što vykarystańnie atamnaj enierhietyki dazvalaje mienš zaležać ad impartu nafty, hazu i inšych vidaŭ paliva.
Na siońnia ŭ Bielhii pracujuć tolki dva reaktary. Adzin znachodzicca na AES «Duł» kala miažy ź Niderłandami, druhi — na stancyi «Tyanž» kala horada Ljež. Spačatku ich taksama płanavali zakryć, ale paśla enierhietyčnaha kryzisu 2022 hoda termin ekspłuatacyi padoŭžyli da 2035 hoda.
Jašče piać reaktaraŭ užo spynienyja. Siarod ich viadomy «Tyanž-2», vakoł jakoha doŭhi čas išli sprečki. U 2012 hodzie śpiecyjalisty vyjavili ŭ jaho korpusie tysiačy drobnych raskolin, paśla čaho ekołahi i palityki patrabavali jaho nieadkładnaha zakryćcia. Kančatkova jon byŭ vyviedzieny z ekspłuatacyi ŭ 2023 hodzie.
Usie bielhijskija reaktary byli pabudavanyja ŭ 1970‑ch i 1980‑ch hadach, tamu častka krytykaŭ ličyć ich maralna i technična sastarełymi.
Bielhija nie adzinaja dziaržava Jeŭrasajuza, jakaja viartajecca da atamnaj enierhietyki. Francyja i tak atrymlivaje bolšuju častku elektraenierhii (kala 65%) z AES. Šviecyja i šerah krain Uschodniaj Jeŭropy taksama robiać staŭku na jadziernuju enierhietyku. U Polščy, naprykład, užo rychtujucca da budaŭnictva pieršaj ułasnaj atamnaj elektrastancyi.
Kiraŭnica Jeŭrakamisii Ursuła fon der Lajen raniej nazyvała admovu ad atamnaj enierhietyki ŭ niekatorych krainach Jeŭropy, u tym liku ŭ Hiermanii, stratehičnaj pamyłkaj. Na jaje dumku, jadziernaja enierhietyka dapamahaje źnizić zaležnaść ad nafty i hazu i ŭmacavać enierhietyčnuju biaśpieku Jeŭropy.
Ursuła fon der Lajen nazvała admovu ad atamnaj enierhietyki stratehičnaj pamyłkaj
«Reniesans jadziernaj enierhietyki» — ES płanuje inviestavać u małyja atamnyja elektrastancyi
ZŠA ŭkładuć 9 miljardaŭ dalaraŭ u armianskuju jadziernuju enierhietyku
Łukašenka zajaviŭ, što choča i treci błok, i novuju AES
Jak Ihnalinskaja AES biezvynikova sprabavała pradać niavykarystanaje jadziernaje paliva
Ci mahčymy druhi Čarnobyl? I što ciapier robiać ludzi na toj AES? Navukoŭka adkazvaje na važnyja pytańni
Ciapier čytajuć
«Ja nie bomž, u mianie navat biełyja škarpetki». U Minsku dziaŭčyna z Łuhanska raskłała pałatku prosta ŭ padjeździe šmatpaviarchovika, ustryvožyŭšy žycharoŭ2020
Kamientary