Rasiejskija televizijščyki pažartavali z Łukašenki, za što byli «zarezanyja» cenzuraj.
Rasiejski Pieršy telekanał zrabiŭsia achviaraj biełaruskaj cenzury. Apošni vypusk štotydniovaj prahramy «Pražektarperyschiłtan» u biełaruskim efiry vyjaviŭsia skaročanym na niekalki chvilinaŭ. Heta satyryčnaja prahrama, u jakoj viadoŭcy pjuć harbatu, truščać piečyva dy, hartajučy hazety, padvodziać vyniki tydnia, daviačysia z rohatu.
U vyrazanym kavałku viadučyja pieradačy paraŭnoŭvali Alaksandra Ryhoraviča z anhielskaj karalevaj dy abmiarkoŭvali navinu pra admienu zabarony biełaruskamu prezydentu na ŭjezd u krainy Eŭrasajuzu (vykazvałasia hipoteza, što najpierš jon naviedaje Dysnejłend).
«Z našaha prezydenta žartujuć davoli časta, naprykład, u KVK. Ale treba razumieć roźnicu pamiž prosta žartami i žartami, što nazyvajecca, na miažy, za jakimi mohuć być surjoznyja nastupstvy, — pahroźliva zajaviła pres-słužba ONT žurnalistu hazety «KP u Biełarusi», jaki patelefanavaŭ na telebačańnie z prośbaj prakamentavać incydent. — U svajoj pracy my kirujemsia zakonam, u tym liku i Kryminalnym kodeksam, u jakim praduhledžana adkaznaść za publičnuju abrazu honaru i hodnaści Alaksandra Łukašenki. I kali my ličym, što jaki-niebudź žart padpadaje pad hety artykuł KK, my prymajem rašeńnie nie vypuskać jaje ŭ efir».
Adzin ź viadoŭcaŭ prahramy «Pražektarperyschiłtan» Siarhiej Śvietłakoŭ tak prakamentavaŭ situacyju: «Kali chto-niebudź dumaje pra cenzuru, to vaźmu na siabie śmiełaść abviernuć hetuju šalonuju dumku. Usia sprava ŭ tym, što kavałak pieradačy pra Łukašenku, jaki nie ŭvajšoŭ u efir, urad vyrašyŭ pradavać u Biełarusi asobna na DVD. Hety rolik, niesumnienna, zrobicca hitom».
Kamientary