«Prašu nie siekčy hałavu»: miedyki Łasicki i Kraŭčonak vystupili z apošnim słovam

1 lutaha ŭ Minskim haradskim sudzie z apošnim słovam pa «spravie miedykaŭ» vystupili eks-namieśnik ministra achovy zdaroŭja Ihar Łasicki i były hałoŭny doktar haradskoj stamatałahičnaj palikliniki №12 Uładzimir Kraŭčonak. Abodvuch sudzili za chabar, jaki jany brali ad kiraŭnikoŭ firmaŭ, što pastaŭlajuć miedabstalavańnie, piša Jeŭraradyjo.

Pavialičyć

U svaim apošnim słovie Uładzimir Kraŭčonak paprasiŭ nie adpraŭlać jaho ŭ kałoniju. Jon skazaŭ, što raskajvajecca «va ŭsich epizodach svaich supraćpraŭnych dziejańniaŭ, pra jakija paviedamiŭ dabravolna».

Pavialičyć

 «Prašu vysoki sud pryznačyć mnie bolš miakki prysud, čym praduhledžaje majo złačynstva, pa jakim mianie abvinavačvajuć… Tak, ja zhodny nieści kryminalnuju adkazanaść za svaje dziejańni. Ale prašu pryznačyć mnie inšaje pakarańnie zamiest pazbaŭleńnia voli. Prašu ŭličyć jaŭku z pavinnaj, čystasardečnaje pryznańnie.., maju sumlennuju pracu ŭ śfiery achovy zdaroŭja, najaŭnaść dački-studentki, baćkoŭ u stałym uzroście, jakim patrebny dohlad. U maci ŭčora zdaryŭsia insult. Maja praca pryniasie ludziam bolš karyści, čym majo znachodžańnie za kratami…Jość pahavorka: «Pavinnuju hałavu mieč nie siače». Prašu nie siačy maju hałavu».

Ihar Łasicki ŭ svaim apošnim słovie zajaviŭ, što pryznaje vinu i «nie źbirajecca asprečvać nivodny epizod». «Vybačajusia pierad sudom za žal da siabie. Składanyja žyćciovyja abstaviny asłabili kantrol, tamu ja ździejśniŭ złačynstva. Chaču, kab sud uličyŭ stan majho zdaroŭja i zasłuhi pierad ajčynaj».

Prakuror Juryj Šarśnioŭ paprasiŭ pakarać Ihara Łasickaha 6 hadami kałonii ŭzmocnienaha režymu, Uładzimira Kraŭčonka — 5 hadami źniavoleńnia z kanfiskacyjaj majomaści. Šarśnioŭ adznačyŭ, što abodva abvinavačanyja pryznali svaju vinu, napisali jaŭki z pavinnaj dy supracoŭničali sa śledstvam, kampiensavali naniesienyja dziaržavie straty.

Prysud pa spravie Ihara Łasickaha i Uładzimira Kraŭčonka ahučać 8 lutaha.

Zhodna z ahučanymi materyjałami spravy, sumy «ŭznaharodžańniaŭ», jakija brali Łasicki i Kraŭčonak, varjiravalisia ad 300 rubloŭ da €15 000.

Byłomu namieśniku ministra Łasickamu staviać u vinu č. 3 art. 430 KK RB (atrymańnie chabaru asobaj, jakaja zajmaje adkaznuju pasadu).

U abvinavačańni fihuruje epizod pieradačy jamu chabaru ŭ $2000 ad Kraŭčonka — nibyta za dapamohu va ŭrehulavańni pytańnia, źviazanaha z kliničnymi vyprabavańniami novych zubnych impłantataŭ.

Łasicki pryznaŭsia, što jon vydatkoŭvaŭ atrymanyja hrošy na lačeńnie niekrozu hałoŭki tazaściehnavaha sustava i apłaty vučoby syna ŭ BDMU. Ad lipienia 2018 hoda eks-namieśnik minsitra znachodzicca pad vartaj. 

Byłoha hałoŭnaha doktara Kraŭčonka abvinavačvajuć pa dvuch artykułach: čč. 2 i 3 art. 430 (atrymańnie chabaru paŭtorna, u asabliva bujnym pamiery), č. 2 art. 424 (złoŭžyvańnie słužbovymi paŭnamoctvami) KK.

Kraŭčonak pravioŭ u SIZA 4 miesiacy, a z kastryčnika 2018 hoda pieraviedzieny pad chatni aryšt, pracuje stamatołaham u 7-j stamatałahičnaj paliklinicy. U pačatku studzienia stała viadoma, što Kraŭčonak zaklučyŭ dasudovaje pahadnieńnie ab supracoŭnictvie. Jon pryznaŭsia, što na atrymanyja hrošy adpačyvaŭ z žonkaj u sanatoryi i za miažoj, a taksama apłačvaŭ navučańnie dački ŭ mieduniviersitecie.

• 0
• 0
• 0
• 0
• 0
• 0
• 0
• 0