Arhanizatary Bright Fest, jaki projdzie 11 maja pierad Jeŭrapiejskimi hulniami na stadyjonie «Dynama», nazvali artystaŭ, jakija vystupiać na fiestyvali. Imi stali Lapis-98, J-Mors, Kasta i Śviatłana Łabada. Chto takaja Śviatłana Łabada, ź jakoj budzie śpiavać Siarhiej Michałok?
Loboda — 36-hadovaja ŭkrainskaja śpiavačka, uradženka Kijeva.
Papularnaj jana stała ŭ 2004 hodzie, kali na karotki termin stała salistkaj papularnaha pop-hurtu VIA Hra. Zatym pačała solnuju karjeru.
U 2013 hodzie Loboda stała zasłužanaj artystkaj Ukrainy.
Za apošnija hady vykanaŭca vyjhrała mnohija muzyčnyja premii ŭ Rasii i Ukrainie.
Z pačatku vajennaj ahresii Rasii suprać Ukrainy Loboda nie spyniła aktyŭnuju hastrolnuju dziejnaść u Rasii, čym vyklikała niehatyŭnuju reakcyju ŭ siabie na radzimie.
Akramia taho, jana vystupaje na pryvatnych viečarynkach dla rasijskich aliharchaŭ jak u Rasii, tak i za jaje miežami.
Viadoma, što jana padtrymlivała prarasijski bajcoŭski kłub Apora i adnajmiennuju arhanizacyju, jakaja viadomaja svaim udziełam u razhonie «Jeŭramajdanu».
Ukrainskija aktyvisty pratestujuć suprać vystupleńniaŭ Łabady ŭ roznych haradach Ukrainy. Mnohija kancerty admianili.
28 maja 2017 u Adesie kala kłuba «Ibiza», dzie pavinna było prachodzić vystupleńnie Śviatłany Łabady, sabralisia ludzi z płakatami, jakija patrabavali admieny kancerta, a taksama zabarony dalejšych vystupaŭ i pazbaŭleńnia Łabady hramadzianstva Ukrainy.
U sakaviku 2017 Łabada sa svajoj maci i pradziusaram Natełaj Krapivinaj vystupili ŭ efiry prapahandysckaha Pieršaha kanała ŭ šou «Niachaj havorać», dzie raspaviali pra «pahrozy ad radykałaŭ», paśla čaho hramadskaja arhanizacyja terytaryjalnaj hramady horada Irpień źviarnułasia z prośbaj razhledzieć dziejańni Łabady na deputackaj kamisii i ŭ SBU. Paśla maci Śviatłany zajaviła, što zdymaje ź siabie deputackija paŭnamoctvy.
Traplała Loboda i ŭ inšyja skandały.
Niekalki hadoŭ tamu achova śpiavački zabłakavała aŭtamabil z žurnalistami i, pahražajučy zbrojaj, kanfiskavała ŭsie zapisy ź videatechniki i videarehistratara.
Palicejskija pierachapili «achoŭnikaŭ» i viarnuli rečy, jakija tyja zabrali ŭ žurnalistaŭ. Sama śpiavačka i pradziusar patłumačyli heta tym, što žurnalisty kanała 1+1 nibyta leźli cieraz płot na pryvatnuju terytoryju da doma, dzie znachodziłasia śpiavačka ŭ siale Hareničy.
Paśla hetaha pradziusar śpiavački stała pahražać žurnalistam. U pryvatnaści, napisała, što viedaje Ramzana Kadyrava, jaki «takich, jak jany, adstrelvaje».
U 2018 hodzie ŭ śpiavački naradziłasia druhaja dačka. Pa čutkach, baćkam dziaŭčynki źjaŭlajecca vakalist niamieckaha hurtu Rammstein Cil Lindeman. Adnak paćvierdžańnia hetaj infarmacyi niama.
Kamientary